Vítima inundasaun 33 iha Oé-Cusse simu ona nesesidade bázika
OÉ-CUSSE, 04 janeiru 2023 (TATOLI) – Família vítima inundasaun 33 ne’ebé hetan afeita hosi korrente mota akontese iha 30 dezembru 2022, daudaun ne’e hetan ona apoia umanitária hosi ekipa Komisaun Jestaun Risku Dezastre (KJRD), Rejiaun Administrativa Espesiál Oé-Cusse Ambeno (RAEOA).
KJRD ne’e komposta hosi Sekretária Rejionál ba Asuntu Edukasaun no Solidariedade Sosiál (SRESS), Autoridade Protesaun Sivíl, hamutuk ho parseiru Dezenvolvimentu Cruz Vermella Timor-Leste Filiál Oé-cusse (CVTL).
Komandante Autoridade Protesaun Sivíl, Herman Metan, informa, ekipa KJRD oferese apoiu umanitária iha tipu rua, food item no non-food item, oferese hahú iha 31 dezembru to’o 03 janeiru 2022 hahú uluk uma-kain 33 iha suku Bobokase, Naimeko no Cunha.
“Família vítima hetan inundasaun akontese udan boot iha semana kotuk konsege estraga uma komunidade inklui to’os no natar, to’o oras ne’e sira hetan ona apoiu umanitária hosi komisaun dezastre naturál Oé-Cusse,” Herman Metan, informa liuhosi telefónika iha Oé-Cusse, kuarta ne’e.
Nia afirma, bainhira akontese inundasaun, hahú iha loron 30 fulan dezembru 2022, ekipa dezastre hala’o kedas atuasaun no halo verifikasaun ba família vítima hamutuk 33 komposta hosi uma-kain 11 iha bairru Nusla’o, aldeia Bihala, aldeia Oé-Baha, suku Bobometo uma-kain ualu (8), suku Costa bairru Samoro uma-kain rua (2), Nunuheno, suku Cunha uma-kain 10, bairru Mahata, suku Costa uma-kain ida (1) no suku Naimeko iha bairru Kuafeu uma-kain ida (1).
“Tipu inundasaun ne’ebé komunidade sira enfrenta, tanba mota estraga uma hela fatin, estraga mós to’os ho natar, ida-ne’e maka merese atu simu apoiu hodi hakmaan sira hosi situasaun ne’e,” nia katak.
Xefe suku Bobokase, Sebastião Cob agradese ba Autoridade RAEOA, tanba ho inisiativa bele koopera no apoia komunidade sira iha situasaun ne’e.
Nune’e nia espera iha futuru Autoridade RAEOA bele ajuda hodi hadi’a netik barajen Tono, no mós kontinua aumenta tán gabiaun as uitoan iha mota Nusl’ao, nune’e bele hamenus netik volume bee tama ba komunidade nia uma.
“Entaun bainhira aumenta gabiaun no hadi’a barajen ne’e, ha’u hanoin iha futuru sei laiha ona problema kona-bá inundasaun,” nia husu.
Entretantu, apoiu umanitária ho tipu food item mak hanesan, foos saka ida, supermie, mina goreng, ikan-lata, susu been no hahán seluk tan, nune’e non-food item komposta hosi ekipamentu dapur nian, ropa, lona, no seluk tan.
Notísia relevante: Inundasaun iha Bobokase, Autoridade RAEOA sei hadi’a barajen Tono
Jornalista: Abílio Elo Nini
Editór: Evaristo Soares Martins
