DILI, 05 janeiru 2023 (TATOLI)—Diretór Nasionál Asaun Sosiál Eskolár (DNASE) ne’ebé trata asuntu Sanitária hosi Ministériu Edukasaun Juventude no Desportu (MEJD), Joaquim Martins, hateten, tempus besik sei apoiu materiál emerjénsia ba eskola sia ne’ebé afetadu dezastre naturál.
“Ita-nia parte simu ona proposta ka dadus kona-ba eskola sia afetadu udan no anin-boot ne’ebé akontese iha loron 30 dezembru to’o 02 de janeiru 2023,” Diretór informa ba Agência Tatoli, iha ninia knaar fatin, MEJD, Vila Verde, kinta ne’e.
Nia dehan, eskola sia ne’ebé dadus iha ona DNASE ninia liman hahú hosi loron 30 to’o 31 dezembru 2022 iha eskola neen ho rezidénsia ida maka afetadu dezastre naturál mak hanesan Eskola Ensinu Báziku Filiál (EBF) Nahaek iha postu Uatulari, munisípiu Viqueque, Eskola EBF Thagapo iha postu Ossu, munisípiu Viqueque, Eskola EBF Tapo Bobonaro, Eskola EBF Wanamor kotomutuluru, postu Lospalos, munisípiu Lautém, EBF kuatru montanhas iha munisípiu Ainaro, Eskola Edukasaun Pre-Eskolár Likidoe iha munisípiu Aileu inklui rezidénsia profesór portugés sira iha Ainaro.
Notísia relevante: Udan-anin sobu eskola tolu iha Ermera
Iha loron 01 to’o 02 janeiru 2023 akontese udan no anin-boot iha munisípiu Ermera, ne’ebé konsege estraga eskola tolu hanesan Eskola Edukasaun Pré-Eskolár iha Holorema sentru hosi Mertutu, EBF Holorema inklui Eskola Ensinu Báziku Sentrál iha Mertutu.
“Hosi eskola sia ne’ebé afetadu udan no anin boot ne’e, ninia grau gravidade kuaze hanesan hotu, parte uma kakuluk hosi eskola sira ne’e anin sobu,” nia akresenta.
Ho nune’e, Diretór Joaquim simu ona orientasaun hosi Ministru Edukasaun Juventude no Desportu, Armindo Maia, atu iha tempu besik bele halo ona obeservasaun ba terrenu hodi haree kondisaun eskola sira hodi bele prepara lalais materiál emerjénsia atu hadi’a hikas eskola sira.
“Ita hein katak tempu badak bele tuun ba vizita eskola sira hotu no bele garante katak molok janeiru ne’e ramata eskola sira bele iha filafali kondisaun di’ak hodi garante prosesu ensinu aprendizajen adekuadu ba estudante sira,” nia tenik.
Aleinde ne’e, DNASE sei esforsu atu halo konfirmasaun ho eskola sira iha munisípiu neen, liu-liu halo esplikasaun ba inan aman sira ne’ebé hamahan-an iha Konsellu País no Autoridade lokál sira katak apoiu emerjénsia ne’ebé ministériu fó ba eskola afetadu dezastre naturál ne’e laiha Mão de Obra, maibé sei apoiu ho voluntáriu atu lori hikas kondisaun eskola sia.
Jornalista : Tomé Amado
Editora : Julia Chatarina
