DILI, 05 janeiru 2023 (TATOLI)—Ministériu Transporte no Komunikasaun (MTK) liuhosi Diresaun Nasionál Transporte Terrestre (DNTT), hahú kuarta (04/01) distribui ona blanku karta kondusaun ba karreta no motór iha munisípiu Dili.
Xefe Departamentu Rejistu DNTT, Amándio do Rosário, hateten, blanku karta kondusaun ne’e tama ona iha dezembru 2022.
“Blanku karta kondusaun ne’ebé tama hamutuk 62.000, ne’ebé ita sei distribui ba munisípiu haat hanesan Manufahi, Bobonaro, Baucau no Viqueque, enkuantu ba munisípiu Dili, ita hahú distribui ona horiseik, blanku karta kondusaun ba Dili de’it hamutuk 35.000 seluk ne’e ba munisípiu sira,” Xefe Departamentu Rejistu, informa ba Agência Tatoli, iha ninia knaar fatin, kinta ne’e.
Notísia relevante: DNTT sei prodús blanku karta kondusaun 60.000 resin iha tinan ne’e
Ba munisípiu haat seluk sei distribui depende ba pedidu totál dokumentu, ne’ebé dadus tama ona sei distribui blanku.
“Hein dadus ne’e tama hotu ona iha fulan ne’e ka fulan oin mak sei distribui hotu, maibé dadus tama sedu iha fulan ne’e nia-laran sei distribui hotu. Tanba ne’e husu ba públiku blanku iha ona, lori imi-nia invoice validade ne’e mai mak bele foti ona blanku ne’e rasik,” nia akresenta.
Jornalista : Arminda Fonseca
Editora : Julia Chatarina
