DILI, 05 janeiru 2023 (TATOLI)—Ministériu Transporte no komunikasaun (MTK) liuhosi Diresaun Nasionál Transporte Terrestre (DNTT) halo ajustamentu ba veíkulu hotu, ne’ebé sei submete inspesaun períodika kada fulan-neen.
“Ita halo mudansa ne’e la’ós atu aumenta presu, maibé halo ajustamentu de’it. Veíkulu hotu sei submete inspesaun períodika kada fulan-neen tanba antes ne’e abitante selu fulan-neen hetan inspesaun tinan-ida, entaun fulan-neen seluk gratuita, entaun ita halo mudansa kada fulan-neen de’it nune’e Estadu labele lakon taxa,” Diretór Nasionál Transporte Terrestre, António da Costa, hateten iha ninia knaar fatin, DNTT, Balide, kinta ne’e.
Notísia relevante: DNTT rekolla reseita millaun $3 iha tinan 2022
Nune’e, nia husu ba públiku sei iha konfuzaun bele ba iha DNTT atubele hetan esplikasaun klaru.
DNTT antes ne’e hatun ona despaixu bazeia ba diploma ministeriál númeru 03/MTCOP/2003 artigu 6 ne’ebé hateten veíkulu hotu sei submete inspesaun períodika kada fulan-neen bazeia ba kódigu dekretu-lei númeru 6/2003 artigu 10.
Nune’e mós, diploma ministeriál númeru 06/2010 artigu 1 kona-ba taxa inspesaun kada fulan-neen ba motór $5, karreta lijeiru $10, ho validade inspesaun to’o tinan-ida, tanba ne’e sinkroniza taxa ho validade inspesaun mak hahú janeiru 2023, taxa motór $10 kada tinan, karreta lijeiru $20 kada fulan no taxa karreta pezadu no transporte públiku mantein tanba válidu inspesaun fulan-neen.
Jornalista : Arminda Fonseca
Editora : Julia Chatarina
