DILI, 05 janeiru 2023 (TATOLI)—Ema na’in-106 hosi suku Tibar no Ulmera, postu administrativu Bazartete, munisípiu Liquiçá serbisu iha Portu Baía Tibar.
“Sira na’in-106 serbisu nu’udar traballadór lokál. Enkuantu, traballadór permanente ne’ebé mak rekruta ona hamutuk na’in-70, hosi alvu 200, ne’ebé hosi númeru ne’e traballadór hosi Portu Dili 38 no traballadór hanesan komunidade lokál hosi suku Tibar no Ulmera 32,” refere nota ne’ebé Agência Tatoli asesu, kinta ne’e.
Aleinde ne’e, traballadór permanente, sub-kontratór sira hanesan empreza Sentinel, PAX no hosi Centro Nacional de Emprego e Formação Professional (CNEFP) Tibar emprega traballadór na’in-76 hosi suku Tibar no Ulmera.
Progresu konstrusaun Portu Baía Tibar to’o iha novembru 2022 atinje ona 99%, hahú operasaun iha loron 30 setembru no ofisialmente inaugura ona iha loron 30 novembru 2022.
Notísia relevante: Alfándega rekolla reseita millaun $100,7
Traballadór sira halo deskarregamentu kontentór sira hosi Singapura iha Portu Tibar, kuarta (14/09/2022). Imajen Tatoli/António Daciparu
Nune’e mós, ró kontentór hamutuk 24 mak atraka iha Portu Baía Tibar durante outubru to’o novembru 2022.
“Governu Timor-Leste liuhosi tarifa konsedente ka taxa navegasaun inklui taxa atrakasaun no pagamentu pur tráfegu (royalty tax) rekolla $195.500 hosi ró kontentór,” esplika nota hosi Ministériu Finansa.
Konsellu Ministru iha loron 21 dezembru 2022 aprova ona variasaun ba kontratu konsesaun hodi halo akizisaun mákina X-Ray Scanner hodi fasilita operasaun Portu Baía Tibar ho konstrusaun infraestrura relevante ho montante investimentu millaun $4,4.
Membru Project Steering Committee Ministru Finansa, Rui Augusto Fomes, Ministru Obra Públika, Abel Pires, no Ministru Transporte no Komunikasaun, José Agustinho da Silva, reprezenta Governu Timor-Leste asina akordu konsesaun ho empreza Timor Port, iha loron 30 dezembru 2022.
Jornalista : Antónia Gusmão
Editora : Julia Chatarina
