iklan

EKONOMIA, HEADLINE

Alfándega rekolla reseita millaun $100,7

Alfándega rekolla reseita millaun $100,7

Ekipamentu ba deskarregamentu kontentór iha Portu Tibar, sesta (07/10). Imajen Tatoli/Francisco Sony

DILI, 03 janeiru 2023 (TATOLI)–Alfándega/Autoridade Aduaneira (AA) iha tinan 2022 rekolla ona reseita hamutuk millaun $100,7 ba kofre Estadu, ne’ebé montante ne’e boot liu kompara iha tinan 2022.

“Valór nominál millaun $100,7 ne’e ultrapasa koleksaun reseita Aduaneira iha tinan 2021 ho montante totál millaun $67,9,” relata nota ne’ebé Agência Tatoli asesu hosi Ministeriu Finansa (MF), tersa ne’e.

Fontes reseita maioria mai hosi pontu entrada sira hanesan portu, aeroportu, fronteira terrestre Batugade no Salele.

“Ho mudansa operasaun hosi Portu Dili ba iha Portu Tibar, fó kondisaun servisu di’ak liután ba Autoridade Aduaneira hodi bele kontribui hasa’e reseita doméstika mai kofre Estadu hodi redús dependénsia ba fundu minarai,” esplika nota.

Notísia relevante: Alfándega arrekada reseita millaun $75,3 iha janeiru to’o outubru 2022

Iha Orsamentu Jerál Estadu (OJE) 2023 ne’ebé hetan ona aprovasaun hosi Parlamentu Nasionál no hetan ona promulgasaun, Governu introdús impostu seletivu konsumu foun ne’ebé inklui 10% impostu ba karreta ho valór liu $10.000, 20% ba karreta ho valór liu $25.000, 30% ba karreta ho valór liu $50.000, aumentu iha impostu konsumu ba tabaku no produtu tabaku seluk hosi $50 kada kilograma sa’e ba $100 kada kilograma

Impostu konsumu foun $1 kada kilograma ba masimidar no introdusaun impostu konsumu foun ho valór $3 kada litru ba bebida midar (fanta, coca-cola, sunkist, sprite no seluk tan), ne’ebé polítika ida-ne’e Governu trasa atu proteje sidadaun nia saúde.

Aleinde ne’e, Governu mós sei hasa’e impostu importasaun hosi 2,5% ba 5%, ne’ebé ho introdusaun impostu hirak ne’e, tuir projesaun reseita doméstika sei sa’e to’o millaun $174,9 iha tinan 2023.

Introdusaun impostu hirak ne’e mós sai nu’udar instrumentu fiskál ne’ebé Governu uza hodi hasa’e koleksaun reseita doméstika iha futuru hodi redús dependénsia ba fundu minarai.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!