VIQUEQUE, 05 janeiru 2023 (TATOLI)–Protesaun Sivil Munisípiu Viqueque sei halo distribuisaun materiál rekuperasaun ba vítima dezastre naturál, semana oin.
“Governu prepara ona materiál rekuperasaun ba vítima dezastre naturál ne’ebé akontese iha tinan kotuk. Daudaun ne’e ami seidauk halo distribuisaun tanba sei enfrenta hela anin-boot, nune’e sei adia ba semana oin mak ami halo distribuisaun,” Komandante Operasaun Autoridade Protesaun Sivil, Inspetór Polísia, Matias da Silva, hateten ba jornalista sira iha ninia knaar fatin, Beloi, Viqueque Vila, kinta ne’e.
Aleinde ne’e, Protesaun Sivil iha semana ne’e kontinua halo asesmentu ba uma sira ne’ebé hetan estragu.
Tuir dadus, uma-kain afetadu dezastre naturál hamutuk 118 mak sei simu materiál rekuperasaun, kompostu hosi postu administrativu lima hanesan Viqueque Vila iha uma-kain 74, Lacluta uma-kain rua, Uatucarbau uma-kain ualu, Uatulari uma-kain 18 no Ossu uma-kain 16.
Notísia relevante: Protesaun Sivil no CVTL fó apoiu ba vítima inséndiu iha Viqueque
“Vítima afetadu hosi munisípiu Viqueque barak, maibé iha distribuisaun ne’e balun seidauk bele hetan, entaun ami sei halo fali reklamasaun ida hodi hato’o ba Governu, nune’e vítima sira bele hetan materiál rekuperasaun hodi hadi’a filafali uma ne’ebé hetan estragru,” nia akresenta.
Materiál rekuperasaun kompostu hosi semente, besi, kalen, besi baja, besi beton no apoiu orsamentu ba vítima sira hodi sosa sásan sira seluk ne’ebé presiza.
Iha distribuisaun ne’e kada uma sei simu kalen 50, besi baja 50, semente 50, besi beton 50 inklui orsamentu tuir kategoria uma a’at totál sei simu $1.000, a’at naton $800 no a’at kma’an $650.
Nia dehan, prosesu distribuisaun materiál rekuperasaun sei halo iha postu administrasaun, hafoin vítima sira lori bá ida-idak ninia uma tanba Governu oferese mós osan transporte ba vítima sira.
Jornalista : Vitorino Lopes da Costa
Editora : Julia Chatarina
