Sarani Viqueque husu misa ba Papa Emérito Bento XVI nia mate

VIQUEQUE, 05 janeiru 2023 (TATOLI)–Autoridade munisípiu Viqueque, funsionáriu administrasaun munisipál inklui sarani sira, kinta ne’e, husu misa ba Papa Emérito Bento XVI, ne’ebé mate iha Vátikanu ho idade 95, iha loron 31 dezembru 2022.

Tuir Padre selebrante, Tiago da costa, Jesus haree ema lubun boot nia sala, hafoin eskolante sira ba besik Jesus hodi dehan ba eskolante sira ksolok ba sira ne’ebé kiak uma-laran, basa reinu lalehan sira di’ak, ksolok sira ne’ebé tanis, basa na’in sei haraik kma’an, ksolok ba sira ne’ebé haraik-an.

“Haksolok ba imi, bainhira tanba ha’u, ema hateten a’at imi no duni imi hodi habosok ba imi-nia serbisu, imi atu halo salvasaun hodi hasai imi-nia kolen iha lalehan,” Amu, Tiago da Costa, hateten iha omília iha Igreja Ti’i Lou Imaculada Conceção, iha rua Prinsipál Dom Jerimias, postu Viqueque Vila.

Notísia relevante: Dom Virgilio Kardeál hato’o sentidu kondolénsia ba Papa Bento XVI nia mate

Padre Tiago dehan, buat ne’ebé futu iha rai, sei futu mós iha lalehan no buat ne’ebé kore iha rai sei kore mós iha lalehan.

“Papa Bento XVI ida-ne’e ita rona kuandu nia troka Papa João II, maibé Papa Bento XVI hala’o ninia knaar, nia sente katak labele ona tanba moras nia rejigna-an hodi fó fali fatin ba sira seluk. Veteranu no sarani sira hotu ne’ebé iha lorokraik ne’e hodi halibur hamutuk reza ba Papa Bento XVI iha serimónia fúnebre ne’ebé hala’o iha Vatikanu,” nia akresenta.

Nune’e Padre selebrante agradese ba autoridade no sarani sira ne’ebé disponibiliza partisipa misa Papa Emeritu Bento XVI nian.

Depois misa ramata, Padre selebrante, Autoridade Viqueque inklui sarani sira kontinua lori ai-funan no lilin hodi kari iha kruz boot Parokia Viqueque.

Misa ne’e partisipa hosi Administradór munisípiu Viqueque, Januário Soares ‘Bolly’, Diretór liña ministeriál, funsionáriu administrasaun munisipál inklui sarani sira iha postu administrativu Viqueque.

Jornalista    : Vitorino Lopes da Costa

Editora         : Julia Chatarina