DILI, 06 janeiru 2023 (TATOLI)—Komisaun D trata asuntu Ekonómia no Dezemvolvimentu iha Parlamentu Nasionál (PN), suspende hela diskusaun projetu-lei númeru 43/V (4a)-Rejime jurídiku Traballu Doméstiku.
Notísia Relevante: Komisaun D no entidade relevante hahú diskute projetu-lei Traballu Doméstiku
Prezidente Komisaun D, Deputadu Antóninho Bianco, hateten projetu-lei ne’e presiza avansa la’o enkuadra diskusaun dala ida ho revizaun Kódigu Laborál.
“Ami hanoin kódigu laborál durante la’o kle’ur ona seidauk iha revizaun maibé iha ona proposta ida hosi Ministériu Koordenadór ba Asuntu Ekonómiku (MKAE) ho Ministériu Finansa (MF) haree hela entaun ami labele halo separadamente ho traballu doméstiku nian. Tanba ita tenke haree mós kódigu Laborál trata hotu ideia sira-ne’ebé iha traballu doméstiku nian,” Prezidente Komisaun D hateten ba jornalista sira iha PN, sesta ne’e.
Tanba trata asuntu sira-ne’e lei ida de’it labele agora Kódigu Laborál seidauk revizaun no projetu-lei traballu doméstiku tama tan.
“Tanba ne’e ami hanoin katak rua ne’e se bele la’o dala ida ho pensamentu ne’ebé iha traballu doméstiku bele enkuandra mós iha kódigu laborál,” nia dehan.
Deputadu Bianco fó ezemplu revizaun ba saláriu mínimu traballadór iha Kódigu Laborál entaun presiza haree enkuadra ho projetu-lei Traballu Doméstiku, inklui matéria sira seluk nune’e presiza lao hamutuk.
“Kódigu Laborál ne’e ho projetu-lei Traballu Doméstiku ne’e ami hein no lei ne’e iha maibé ami tenke hein Governu tenke aprezenta mós Kódigu Laborál ne’e revizaun ida tenke halo melloramentu ida-ne’ebé laiha ita tenke aumenta artigu balun dentru lei ne’e bele aspirativu ona ita rona kleur ona hodi regulariza renumerasaun,” nia hateten.
Komisaun mós koordena ho SEFOPE, MF, MKAE no rona hosi Governu hodi bele aselera prosesu revizaun Kódiku Laborál lalais hafoin bele enkuadra mós projetu-lei Traballu Doméstika, nune’e komisaun hein se Governu aselera lalais iha 2023 ne’e hodi mai PN bele finaliza.
Jornalista : Nelson de Sousa
Editór : Cancio Ximenes
