DILI, EKONOMIA, HEADLINE, POLÍTIKA

Komisaun D no entidade relevante hahú diskute projetu-lei Traballu Doméstiku

Komisaun D no entidade relevante hahú diskute projetu-lei Traballu Doméstiku

Prezidente Komisaun D Ekonomia no Dezemvolvimentu, Deputadu Antoninho Bianco. Imajen TATOLI/Francisco Sony

DILI, 22 setembru 2022 (TATOLI)—Komisaun D trata asuntu Ekonómia no Dezenvolvimentu iha Parlamentu Nasionál (PN) ho entidade relevante hahú halo audiénsia públika ho entidade relevante hodi diskute no rona hanoin kona-ba projetu lei númeru 43/V (4a)-Rejime Jurídiku Traballu Doméstiku.

Notísia Relevante: PR Horta: Presiza kria kuadru legál proteje traballadór doméstika iha rai-laran

Entidade relevante sira-ne’ebé Komisaun D konvida mak hanesan Sekretária Estadu Formasaun Profesional no Empregu (SEFOPE), Konfederasaun Sindikatiku Timor-Leste (KSTL) no asosiasaun feto sira.

Prezidente Komisaun D, Antoninho Bianco, esplika konseitu ba projetu lei ne’e atu regulariza traballador doméstiku sira-ne’ebé hala’o servisu iha uma laran hanesan hein labarik iha uma no seluk tan ne’ebé normalmente durante ne’e sira ba hala’o servisu ho de’it verbalmente laiha kontratu.

“Nia objetivu mak ne’e, sé-sé mak servisu tenke iha kontratu no tama ba Institutu Nasionál Seguransa Sosiál (INSS) regulariza hotu. Objetivu seluk mak ema labele sai vítima ka labele sai atan ba ema seluk hanesan patraun,” Antoninho Bianco hateten ba jornalista sira iha Parlamentu Nasionál, kinta ne’e.

Nia hatutan, aban bainrua bainhira empregadór ida mak bankrut exemplu ho situasaun COVID-19 entaun Estadu bele halo intervensaun no loos duni katak ema ne’e traballador duni iha ne’e.

Liuhosi audiénsia ne’e, Komisaun D ho entidade sira-nia hanoin ba inisiativa lejislativa ne’e di’ak tebes.

Notísia Relevante: SEFOPE submete ona ezbosu lejizlasaun regula traballu doméstiku ba MKAE

“Komisaun hala’o audiénsia ho sira enjerál hotu-hotu kuaze atu halo lei ida, maibé liga mós lei traballadór ba revizaun lei kódiku laborál tanba ita halo hotu liga ba ema-nia servisu. Entaun, ko’alia kona-ba nivél saláriu mínimu, mezmu ema servisu doméstika iha uma laran,” nia dehan.

Nia hateten, lei ne’e balun liga ba konvensaun internasionál nian no rai seluk nian liga ho Ti,or-Leste nia kultura ladún tanba traballadór doméstiku mai hosi projetu-lei no hanoin jerál ne’e mundu aplika hotu.

“Ezemplu, ema ida iha uma ida, nia mai fase bikan entaun fase bikan de’it, maibé ita-nia rai Timor seidauk iha hanesan ne’e. Entaun, traballador doméstiku liga ba ida-ne’e ita tenke haree hotu kondisaun ho ita-nian,” nia hateten.

Tanba ne’e, nia dehan, presiza halo estudu kle’an ho kondisaun reál rai-laran no komisaun sei kontinua halo audiénsia ho entidade relevante sira seluk tan, hodi rona mós sira-nia hanoin.

“Tanba ne’e, ami sei halo kontinuasaun audiénsia no sei rona parte barak nia hanoin,” nia dehan.

Inisiativa projetu-lei ne’e mai hosi Deputadu proponente sira Grupu Mulher Parlamentár Timor-Leste (GMPTL) no projetu lei ne’e iha artigu hamutuk 30-resin.

Notísia Relevante: FONGTIL rejista traballadór doméstika 238 servisu iha Dili

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!