DILI,07 janeiru 2023 (TATOLI) – Servisu Autónomu Medikamentu Ekipamentu Saúde (SAMES) sei kompras tipu medikamentu hamutuk 452.
“Iha lista jerál, item medikamentu ne’ebé mak ita sei kompras iha tinan ne’e hamutuk 452 item, tipu aimoruk espesialista iha 152 no reajente hamutuk 300”, Diretór Ezekutivu SAMES, Santana Martins, ba TATOLI iha Hotel Timor, ohin.
Prosesu akizisaun dahuluk ba tinan 2023, oras ne’e daudaun, SAMES simu ona dadus kuantifikasaun husi Minsitériu Saúde no mós Laboratóriu Nasionál.
“Agora ita analize kustu depois ita halo aplikasaun ba projetu sira tanba daudaun ita avansa ona prekualifikasaun iha 2022 nian”, revela.
Na dehan bainhira halo tiha prekualifika tenke avansa ho projetu konkursu restritu maibé daudaun ne’e rejime aprovisionamentu foun la prevee ona iha SAMES, entaun ida ne’e halo estudu fila fali hamutuk ho parte legál sira.
“Orsamentu 2023 ne’ebé aloka ba kompra medikamentu, bens konsumu no mós reajente hamutuk milliaun $ 5.6, ita aloka orsamentu ba vasina mil $ 490-resin, ba komuniti planeamentu familiár rihun $ 270 depois ita aloka orsamentu rihun $500, iha kapitál menór ne´ebé atu kompra fasilidade no instrumentu sira ne’ebé mak oras ne’e daudaun ami halo hela ezersísiu”, adianta.
Diretór refere ba medikamentu maizumenus SAMES presiza milaun $10.3 no laboratóriu nian milaun $6.6, entaun ida ne’e mak tenke ajusta tuir orsamentu ne’ebé mak iha.
Iha 2023 SAMES prevee $9.235.500 iha Orsamentu Jerál Estadu hodi kobre ba saláriu vensimentu, bens servisu, kapitál menór no kapitál dezenvolvimentu.
Jornalista : Felicidade Ximenes
Editór : Zezito Silva
