iklan

EDUKASAUN, HEADLINE

Servisu Edukasaun Munisipál konsidera mosu manipulasaun valór estudante mellór klasifikadu

Servisu Edukasaun Munisipál konsidera mosu manipulasaun valór estudante mellór klasifikadu

Estudante Eskola Sekundária Jerál Públikq Suai partisipa ezame períodu daruak. Imajen Tatoli/Celestina Teles

DILI, 06 janeiru 2023 (TATOLI)–Diretór Servisu Edukasaun Munisipál konsidera mosu ona manipulasaun valór hosi estudante sira ne’ebé sai mellór klasifikadu atu asesu ba bolsa méritu hosi Ministériu Edukasaun Juventude no Desportu (MEJD).

Diretór Servisu Edukasaun Munisípiu Covalima (DSEMC), Rui Amaral Suri Seran, haktuir, iha Covalima, identifika ona estudante ida ho valór boot liu entre nia maluk seluk maibé la hetan primeiru lugár.

“Asuntu estudante mellór klasifikadu agora iha problema boot. Estudante ida iha ensinu sekundáriu jerál Suai ne’ebé hetan valór 52 iha rezultadu ezame nasionál, hetan fali kuatru lugár, depois ida hetan valór 49 ne’e maka sai fali primeiru lugár,” Diretór Servisu Edukasaun Munisípiu Covalima informa ba Agência Tatoli, via telefónika, sesta ne’e.

Notísia relevante: MEJD prevee millaun $7,2 atu atribui ba estudante mellor klasifikada

Nia dehan, daudaun inan aman sira halo hela protesta iha eskola kona-ba desizaun ministériu ba valór ne’ebé deside la tuir realidade, nune’e parte Edukasaun Munisípiu Covalima husu inan aman konfirma direta ho nasionál.

“Ami ladún hatene ho desizaun kona-ba valór sira, karik sistema mak ladi’ak ka keta karik iha ema laran ruma halo ida-ne’e, ami husu ona ba inan aman sira atu halo konfirmasaun ho parte Edukasaun Nasionál, liu-liu Diresaun Kurríkulu Nasionál atu hetan esplikasaun liután,” nia tenik.

Tuir Diretór Rui, iha munisípiu Covalima antes ne’e halo ona identifikasaun ba estudante mellór klasifikadu hosi nível ensinu sekundáriu ne’ebé identifikadu entre estudante ualu, ida maka hetan valór boot liu.

“Iha estudante ida ho valór 51 no estudante neen ho valór 49. Edukasaun Munisipál rejista ona keixa sira no informa mós ba nasionál atu rezolve kauza sira ne’e lalais,” nia tenik.

Nune’e mós, Diretór Servisu Edukasaun Munisípiu Manufahi (DSEMM), Vitorino do Carmo, informa, estudante mellór klasifikadu iha Manufahi daudaun mosu preokupasaun boot tanba iha kontradisaun valór estudante sira ne’ebé halo inan aman no parte eskola sira tenke hamosu diskusaun boot, tanba ne’e parte munisipál husu ona Unidade Kurríkulu Nasionál atu toma responsabilidade ba asuntu ne’e.

“Ami simu valór reál ne’ebé Ministru Edukasaun anúnsia iha rezultadu ezame nasionál ne’ebé akontese iha loron 09 dezembru 2022, agora iha hotu ami-nia liman, maibé rezultadu ne’ebé Unidade Kurríkulu Nasionál fó sai fali kona-ba atribuisaun bolsa méritu ne’e la hanesan,” nia konta tuir.

Tuir nia, lista ne’ebé Unidade Kurríkulu Nasionál konsidera no haruka mai Servisu Edukasaun Munisipál ne’e la tama nu’udar estudante mellór klasifikadu atu hetan bolsa méritu, maibé lista seluk maka tama.

“Tanba ne’e mak mosu preokupasaun boot iha eskola hotu iha territóriu nasionál, ne’ebé agora kada munisípiu sira hein hela konfirmasaun hosi nasionál,” nia salienta.

Iha sorin seluk, Diretór Jerál Edukasaun Ensinu hosi MEJD, Luís Manuel da Costa Fernandes, hateten, asuntu ida-ne’e seidauk bele informa ba públiku tanba sei hein desizaun hamutuk.

“Ami sei hein hela relatóriu Unidade Kurríkulu Nasionál, bainhira tama ona maka foin bele fó sai ba públiku,” nia dehan.

Tuir Diretór Luís, asuntu ne’e hetan ona intervensaun hosi Ministru Edukasaun Juventude no Desportu, Armindo Maia, tanba ne’e halo ona sorumutuk iha loron 05 dezembru hosi dadeer to’o lorokraik hodi diskute asuntu (la esplika detallu desizaun ruma ne’ebé foti).

Ba kestaun ne’e jornalista Agência Tatoli tenta konfirma ho Koordenadór Unidade Kurríkulu Nasionál, Mateus do Reis, maibé nia laiha fatin.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!