Uma 75 iha Covalima sai vítima ba dezastre naturál
COVALIMA, 06 janeiru 2023 (TATOLI)–Komisaun Jestaun Risku Dezastre Naturál Munisípiu Covalima (KJRDN) identifika uma 79 sai vítima ba dezastre naturál iha munisípiu Covalima.
“Ami hakarak relata dadus relasiona ho akontesimentu dezastre naturál ho tipu anin sobu uma iha Covalima hahú iha kinta (27/12 /2022) to’o tersa (03/01/2023). Bazea ba ekipa verifikasaun halo levantamentu dadus iha postu administrativu hitu hamutuk uma 79 ho tipu dezastre naturál anin sobu uma,” Portavós Komisaun Jestaun Risku dezastre Naturál Covalima, Francisco de Jesus Alves, relata dadus ne’e ba jornalista sira liuhosi konferénsia imprensa ne’ebé realiza iha salaun Administrasaun Munisípiu Covalima (AMC), Sukaer Laran, sesta ne’e.
Ekipa halo levantamentu dadus vítima dezastre naturál provizóriu uma 79 iha postu administrativu hitu ne’ebé fahe ba katégoria uma aat totál hamutuk 26, aat naton iha uma 14 no uma aat kmaan hamutuk 39.
Ekipa identifika uma 79 ne’ebé anin sobu ne’e iha postu administrativu sira hanesan postu administrativu Zumalai iha uma 30 ne’ebé kompostu hosi suku Zulo iha uma 12, Raimea 13, Tashilin haat (4) no Lepo ida (1).
Iha postu administrativu Fohorem ne’e identifika uma kain 24 ne’ebé kompostu hosi suku Fohorem ne’e iha uma ualu (8), Lactos haat (4) no suku Dato Tolu iha uma 12 mak anin sobu.
Iha postu administrativu Maucatar ne;e identifika sia (9) ne’ebé kompostu hosi suku Holpilat iha uma lima (5), Matai rua (3) no Belecasak identifika uma rua (2) mak aat.
Iha postu administrativu Fatululik komisuan identifika uma 11 mak anin sobu, ne’ebé kompostu hosi suku Taroman iha uma 10 no suku Fatululik ne’e uma ida (1).
Iha postu administrativu Suai ne’e uma rua (2) mak anin sobu ne’e iha suku Debos iha uma ida (1) no suku Labarai iha uma ida (1).
Iha postu administrativu Tilomar ne’e identifika iha uma rua (2) anin sobu ne’e akontese iha suku Lalawa, no iha postu administrativu Fatumea ne’e anin sobu uma ida iha iha suku Nanu.
Ho nune’e, nia hateten, iha tempu badak ekipa sei fó apoiu emerjénsia ba vítima hirak ne’ebé afetadu ba dezastre naturál iha Covalima.
Jornalista : Celestina Teles
Editór : Cancio Ximenes
