Zumalai submete ona relatóriu PMOPA faze dahuluk-daruak ba AMC
COVALIMA, 06 janeiru 2023 (TATOLI)–Xefe sesaun finansa postu administrativu Zumalai, Benjamin da Costa, hateten nia-parte submete ona relatóriu implementasaun Programa Mão de Obra Postu Administrativu (PMOPA) faze dahuluk no daruak nian ba Administrasaun Munisípiu Covalima (AMC).
Notísia Relevante: Projetu PMOPA faze daruak iha Fatumea-Tilomar-Fohorem finaliza ona
“Ha’u hanoin ami submete ona relatóriu implementa PMOPA faze dahuluk no daruak ba iha Administrasaun Munisípiu Covalima. Ba faze dahuluk iha outubru no faze daruak submete iha dezembru tinan 2022,” Xefe sesaun finansa Zumalai, Benjamin da Costa, informa ba Agência Tatoli iha resintu AMC, Sukaer Laran, sesta ne’e.
Durante implementasaun PMOPA faze dahuluk no daruak iha Zumalai ne’e foku ba programa sira hanesan reparasaun estrada kiik, protesaun ba bee-matan, limpeza jerál ba esgotu, manutensaun no hadi’a jardim postu no suku sira-ne’ebé presiza jardim.
Implementasaun PMOPA iha Zumalai ba faze dahuluk benefisiáriu 10,67 ne’e konsege fó servisu ba trabaldór 432 ba faze daruak traballadór na’in-960, nune’e bele atinje meta tuir matadalan haruka.
PMOPA faze dahuluk iha postu Zumalai kria ba grupu 21, faze daruak kria ba grupu 24 ne’ebé kada grupu traballdór na’in-40 tanba grupu halo rotasaun grupu ida traballadór 20.
Totál orsamentu implementasaun PMOPA ba postu administrativu Zumalai hamutuk faze dahuluk $57,260 no faze daruak mós ho orsamentu $57,260 hosi orsamentu ne’e loron ida selu traballadór $5.00 no ba supervizór loron ida kada ema ida hetan $7.00.
Enkuantu Governu liuhosi Ministériu Administrasaun Estatál (MAE) transfere orsamentu implementa programa ba munisípiu Covalima hamutuk $782,102 ba iha konta bankaria munisípiu nian.
Jornalista : Celestina Teles
Editór : Cancio Ximenes
