DILI, 07 janeiru 2023 (TATOLI)–Emanuel Moniz Martins da Costa, akompaña hosi nia família, sábadu ne’e, hato’o keixa ba Polísia Sientífika Investigasaun Kriminál (PCIC, sigla portugés) hasoru ema balun ne’ebé lansa informasaun iha rede sosiál, katak nia maka nu’udar suspeitu prinsipál ba kazu omisídiu iha área Elemloi.
Isac Sinarai da Costa (20) hetan oho hosi ema deskoñesidu iha sesta (06/01) maizumenus tuku 02:00 madrugada, iha área Elemloi Delta III, suku Comoro, postu administrativu Dom Aleixo, munisípiu Dili.
“Ha’u mai PCIC atu hato’o keixa hasoru ema sira ne’ebé halo defamasaun mai ha’u iha rede sosiál Facebook no WhatsApp, ne’ebé maka daudaun viral tebes, katak ha’u maka suspeitu ba kazu krime iha Delta III,” Emanuel Moniz, hateten hafoin hato’o keixa iha edifísiu PCIC, Caicoli.
Notísia relevante: Kazu omesídiu iha Elemloi PNTL asegura ema nain-lima
Nia dehan, keixa ne’e rasik atu husu de’it ba ema hirak ne’ebé lansa informasaun iha públiku, atu hadi’a nia ho família nia naran di’ak, tanba defama ona katak nu’udar suspeitu ba kazu omisídiu.
Nune’e, Emanuel Moniz konta tuir kronolojia katak, momentu akontese ema deskoñesidu oho Isac Sinarai da Costa iha área Elemloi Delta III, nia (Emanuel) ho motór foin fila hosi festa, entaun momentu nia liu hosi diresaun Elemloi, haree ema habriik hobur matebian Isac Sinarai ne’ebé monu hela iha rai.
“Ha’u haree matebian nakonu ho ran, entaun ha’u para no momentu ne’ebá ha’u haree nia primu sira ne’ebé ho matebian hemu tua hamutuk maka hambriik iha ne’ebá, tanba sira kontaktu ambulánsia mai kle’ur, entaun sira husu ajuda mai ha’u atu tula alin ne’e bá óspitál tanba foin hetan sona hosi ema deskoñesidu. Entaun nu’udar ema ne’ebé iha sentimentu umanu, ha’u bá besik hodi ajuda matebian, tanba nia iis sei iha, ha’u ho matebian nia primu tula ba ha’u-nia motór leten, ami lori matebian ba ospitál Comoro,” nia haktuir.
Bainhira to’o ospitál, Emanuel ho matebian nia primu maka hatoba matebian iha kama hodi husu doutór fó tratamentu, maibé doutór informa katak matebian Isac Sinarai nia iis laiha ona.
“Ha’u sai mai iha momentu ne’ebá, maun Polísia ida maka la’o hasoru ha’u hodi husu no ha’u konta tuir kronolojia ba nia. Maun Polísia ne’e maka momentu ne’e foti ha’u-nia foto no xapa matríkula motór nia,” Emanuel Moniz, tenik.
Hafoin Emanuel fila mai uma, bainhira iha uma, nia hetan kontaktu hosi Polísia hodi bá fali ospitál.
“Ha’u ba filafali ba óspitál no iha ne’ebá ha’u hetan matebian nia inan aman, sira fó obrigadu mai ha’u tanba ajuda ona sira-nia oan,” nia realsa.
Hafoin ne’e, iha sesta dadeer, Emanuel hetan kotaktu hosi Polísia Nasionál Timor-Leste (PNTL) Eskuadra hodi submete ba indentifikasaun no kontinua submete ba prosesu investigasaun iha Departementu Investigasaun Kriminál Komandu Jerál PNTL, Caicoli.
“Iha ne’ebá maka Polísia sira hateten, ami bolu ita-boot mai tanba bazeia ba ita-nia foto ne’ebé virál iha rede sosiál, katak ita-boot maka suspeitu ba kazu Elemloi,” Emanuel Moniz, haktuir tan.
Ho nune’e, Emanuel Martins ho família sente vida ameasadu ona tanba ho informasaun iha rede sosiál, maibé asaun ne’ebé nia halo momentu ne’ebá hanesan sentimentu umanu.
“Ha’u sei kontinua hato’o keixa ba Departementu Invesigasaun Kriminál hodi keixa oknum Polísia ne’ebé momentu ne’ebá públika ha’u-nia fotografia iha madrugada, tanba ha’u la’ós suspeitu prinsipál ba kazu omisídiu iha Delta,” nia relata.
Jornalista : Natalino Costa
Editora : Julia Chatarina
