DILI, 07 janeiru 2023 (TATOLI)–Prezidente Repúblika (PR), José Ramos Horta, kondekora medalla méritu ba Embaixadór Koreia Súl iha Timor-Leste, King Jeong, ne’ebé termina ona misaun.
“Atribuisaun medalla méritu hanesan rekoñesimentu ba Embaixadór Koreia tanba sira mai reprezenta sira-nia rai no sira ida-idak halo kompromisu buka hametin relasaun ho Timor-Leste, entaun bainhira sira fila, buat ne’ebé ita halo nu’udar Estadu mak fó kondekorasaun ba sira-nia servisu,” PR Horta, hateten ba jornalista sira hafoin atribui medalla iha Palásiu Prezidensiál, Bairro Pité, sábadu ne’e.
Timor-Leste nia relasaun bilaterál ho Koreia Súl metin durante tinan 20 resin, ho servisu Embaixadór nian durante hala’o misaun kontinua hametin relasaun liuhosi hala’o atividade kulturál barak hodi hatudu realidade Koreia nian inklui apoiu iha setór vitál sira seluk.
“Koreia partisipa ho forsa pás iha Timor ho INTERFET, ne’ebé hala’o manutensaun pás depois aumenta relasaun bilaterál, tanba Koreia simpatia maka’as ho Timor-Leste, primeiru demokrásia no sira-nia istória rasik povu koreanu terus hanesan okupasaun estranjeiru no ki’ak hanesan ho ita, maibé sira-nia domin no disiplina ba sira-nia rai, agora Koreia sai poténsia ekonomia modernu iha mundu,” Horta akresenta.
Notísia relevante: Horta kompromete sei intensifika relasaun bilaterál ho Korea Súl
Iha biban hanesan, Embaixadór, King Jeong, agradese ba atribuisaun medalla hosi Prezidente Repúblika.
“Mezmu tinan-rua ha’u la halo buat barak, maibé agradese tebes bele oferese medalla ne’e. Sente onra tebes no dezeju nafatin prosperiedade entre Timor-Leste no Koreia ba futuru,” nia tenik.
Diplomata koreanu ne’e fiar katak ho lideransa PR Horta, Timor-Leste sei joven agora, maibé iha tinan 20 mai oin sei sai nasaun dezenvolvidu liután no Governu koreanu hakarak hato’o kompromisu nafatin apoiu Timor-Leste ninia adezaun ba Asosiasaun Nasaun Sudeste Aziátiku (ASEAN, sigla inglés) no apoiu saida de’it mak presiza, Koreia prontu atu apoiu.
“Tanba ne’e , fízikamente bele husik Timor, maibé hau-nia fuan sempre iha Timor no fila bá Koreia sei sai hanesan boa vontade nafatin hodi promove Timor iha Koreia, atu nune’e bele hametin nafatin lasu entre nasaun rua iha futuru,” nia tenik.
King Jeong adianta, Embaixadór foun sei to’o iha tempu badak, fiar katak sei servisu maka’as liután atu mantein nafatin kooperasaun ne’ebé mak iha ona no sei servisu hamutuk ho Prezidente Repúblika hodi dezenvolve nasaun ne’e.
“Ikus liu, ha’u nafatin reza ba Na’i Maromak, fó bensa ba Timor-Leste, ba saúde Prezidente Horta no ba prosperiedade Timor iha futuru,” nia dehan.
Antes ne’e, Embaixadór King Jeong entrega kredensiál ba Prezidente Repúblika iha loron 15 janeiru 2021.
Jornalista : Nelson de Sousa
Editora : Julia Chatarina
