Aban, STAE halo “virtual meeting” ho embaixadór-konsuladu iha diáspora
DILI, 09 janeiru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten nakait ho eleisaun parlamentár mak Governu liuhosi STAE sei halo virtual meeting iha tersa (10/01) aban.
Notísia Relevante: Eleisaun parlamentár 2023, CNE preparadu no hein PR anúnsia kalendáriu
Virtual meeting ne’e, STAE hamutuk Ministériu Negósiu Estranjeiru no Kooperasaun (MNEK) ho Dirasaun Notariadu, Ministériu Justisa (MJ) hala’o enkontru ho embaixadór ho konsuladu sira iha diáspora hodi ko’alia kona-ba resensiamentu eleitorál no baze dadus iha rai-li’ur.
“Konkluzaun hosi enkontru entre MNEK, liuhosi dirasaun noatariadu ne’e ita konkorda atu halo virtual meeting ida ho embaixadór ho konsuladu sira diáspora nian iha MNEK, kona-ba kondisaun ba resensiamentu eleitorál iha rai-li’ur no mós atualizasaun baze dadus,” nia dehan ba Agência Tatoli, iha iha nia kna’ar fatin Caicoli, segunda ne’e.
Tuir nia, sidadaun barak mak halo traballu iha Tasmania no Queensland Austrália nian, entaun presiza hanoin ruma hosi embaixada kona-ba koordenasaun kodisaun iha ne’ebá.
“Nune’e, ita-nia prezensa iha ne’ebá ne’e labele difikulta fali tékniku nian ba halo atendimentu iha ne’ebá. Agora planu STAE iha ne’ebá mak atu kria sentru atendementu iha ne’ebá, maibé ita mós presiza hatene tuir lei resensiamentu rasik iha área judisiariu ne’ebé autoridade lokál rai ne’ebá ne’e konkorda. Tanba ne’e ita presiza embaixada sira iha ne’ebá, nia garante nune’e STAE bele hala’o nia servisu iha ne’ebá,” nia dehan.
Enkontru ne’e akontese tanba tékniku hosi STAE hakarak hatene kondisaun no fatin, nune’e STAE bele prepara no akomoda tuir saida mak sei presiza hodi kompleta.
Tanba, fatin ne’ebé mak planu atu halo atendimentu iha ne’ebá ne’e dook hosi sidadaun sira entaun presiza hatene.
“Tanba eleisaun anterior ne’e ita-nia sidadaun nia partisipasaun tun tanba dook hosi fatin ne’ebé ita-nia emar hela bá, nune’e ita bele koloka tuir de’it, Entaun, ho ida-ne’e, presiza halo virtual meeting,” nia dehan.
Maibé, nia dehan, bainhira mak halo resensiamentu eleitorál iha rai-liur ne’e presiza hetan aprovasaun hosi Governu.
“Ha’u kordena ona ho parte jurídiku MAE nian, tanba bainhira atu hala’o iha rai-li’ur ne’e presiza aprova hosi Governu para ita bele estabelese tuir kalendáriu no ida-ne’e atu halo ona karta ba MAE no iha tempu badak sei lori ba Konsellu Ministru,” nia dehan.
Resensiamentu ieleitorál ha rai-laran ne’e, nia dehan, sei halo lansamentu abertura ba resensiamentu eleitorál iha loron 17 janeiru tinan ne’e.
Jornalista : Osoria Marques
Editór : Cancio Ximenes
