DILI, 09 janeiru 2023 (TATOLI)—Ekipa Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P), segunda ne’e, kontinua halo inspesaun ba estabelesimentu empreza importadór sira no husu atu fa’an produtu ne’ebé iha ho folin anteriór tanba atuál produtu hanesan stock tuan iha armazen no seidauk aplika taxa importasaun foun.
“Ohin ita kontinua halo inspesaun ba empreza importadór sira hanesan Perissos, ita tenta husu filafali sira-nia fatura ba presu sasán ne’ebé sira fa’an. Ita konsege foti fatura balun maibé sira-nia dirijente sei iha rai-li’ur, entaun provizóriu ita husu produtu ne’ebé sira fa’an liuliu masin-midar, bebida non akoólika ne’ebé sira hasa’e nia folin, atu fa’an ho folin anteriór tanba lei kona-ba hasa’e taxa ne’e foin vigór iha 04 janeiru 2023 no sasán ne’ebé sira fa’an agora hanesan stock tuan, entaun laiha razaun ba sira atu foti presu ne’e sa’e,” Sub-Inspetór Jerál AIFAESA, I.P, Dionísio Neto da Silva, hateten, iha armazen Perissos, Fatuhada.
Notísia relevante: MTKI konsidera empreza balun halo espekulasaun presu sasán
Biban ne’e, AIFAESA, I.P husu ba vendedór sira, bainhira sosa tutan hosi empreza distribuitór sira ho presu a’as, bele mai hasoru AIFAESA, I.P hodi aprezenta fatura kompra hanesan evidénsia hasoru distribuitór sira.
“Nune’e ita bele haree sira fa’an folin karun ne’e selu taxa duni ba agora sa’e ne’e ka, sira halo asaun asambarkamentu. Tanba ita iha lei númeru 4/2011 01 juñu kona-ba krime asambarkamentu no espekulasaun, bandu produtu stock tuan ne’ebé sei iha labele kontinua fa’an ho presu a’as maibé sira aproveita fali situasaun hanesan agora hodi fó halo presu sa’e hanesan agora,” nia akresenta.
Nia konsidera, kona-ba loja ditributór sira ne’ebé hasa’e folin sasán la tuir lei hanesan natureza krime kontra 04/2011 01 juñu kona-ba krime asambarkamentu no espekulasaun, entaun durante prosesu tomak AIFAESA, I.P sei entrega ba Ministériu Píbliku.
“Ita hotu hatene, tuir lei produtu ne’ebé daudaun taxa sa’e a’as ne’e mak bebida non alkoólika, masin-midar, tabaku no karreta ba produtu seluk ne’e sei sa’e maibé to’o 5% de’it. Maibé sira fa’an produtu masin-midar, bebida non akoólika liu, tanba folin antes masin-midar $43 agora sa’e ba $80, no bebida non akoólika $6 sa’e ba $18, ” Dionísio dehan.
AIFAESA, I.P halo inspesaun hamutuk ho Ministériu Turizmu Komérsiu no Indústria (MTKI) liuhosi Diresaun Nasionál Regulasaun Konsumidór.
Jornalista : Arminda Fonseca
Editora : Julia Chatarina
