DILI, 09 janeiru 2023 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, relata MESSK deside ona valór rejime jerál ba estudante ensinu sekundáriu jerál no tékniku vokasionál (TEKVOK) atu iha separasaun hodi asesu Universidade Nasionál Timor Lorosa’e (UNTL) no Instituisaun Politékniku Betano (IPB) tinan akadémiku 2023.
Notísia Relevante: MESSK disemina kritéria rejime jerál no espesiál asesu UNTL-IPB iha Oé-Cusse
”Ha’u hakarak informa katak asuntu kona ba rejime jerál iha tinan kotuk sai konfuzaun ba entidade hotu dala barak ita-nia na’i deputadu sira kestiona relasiona ho valór ne’ebé mak ita deside ba estudante rejime espesiál nivel ensinu sekundáriu jerál no tékniku vokasionál ne’e la relevante,” Governante ne’e hateten ba jornalista sira iha salaun MESSK Colmera, segunda ne’e.
Hosi MESSK nia esperiénsia ne’ebé akontese iha tinan sira liu ba ne’e mak agora Ministériu Ensinu Superiór Siénsia no Kultura halo ona separasaun ba rejime jerál rua mak hanesan rejime jerál ba ensinu sekundáriu jerál no rejime jerál ba tékniku vokasionál tanba diferensa dixiplina.
Tuir nia, MESSK tenke halo duni separasaun ne’e tanba iha ensinu sekundáriu jerál hetan disiplina hamutuk neen (6) no iha nivel ensinu tékniku vokasionál hetan de’it disiplina hamutuk haat (4).
“Ita halo separasaun ne’e hodi fó balansu rejime rua ne’e atu hetan oportunidade hotu hodi asesu ba Instituisaun Ensinu Superiór públiku tanba se lae rejime jerál ba tékniku vokasionál sei sai vítima sira iha dixiplina haat de’it,” nia dehan.
Hosi separasaun valór ba nivel rua ne’e mak estudante nivel ensinu sekundáriu jerál ne’ebé mak atu asesu ba IESP UNTL-IPB tenke hetan valór mínimu 42 no valór másimu 50.
Ezemplu, hosi fakuldade medisina departamentu medisina jerál, parteira, enfermajen, nutrisaun no laboratóriu sira ninia valór referénsia mínimu 47 no másimu 50 maibé ne’e refere ba estudante sira-ne’ebé mak finaliza sira -nia estudu iha nivel ensinu sekundáriu jerál departamentu siénsia natural.
Enkuantu ba estudante sira hosi nivel ensinu tékniku vokasionál sira sei la bele asesu ba dixiplina siénsia naturál, tanba ne’e mak MESSK halo separasaun entaun valór ne’ebé mak deside ona ba sira ki’ik liu mak 24 no másimu 36, no hosi rezultadu valór ne’ebé iha mak sei bele asesu ba vaga ne’ebé mai hosi instituisaun ensinu superiór públiku UNTL no IPB.
“Mekanizmu ida ne’e ita halo atu bele iha balansu entre ensinu sekundáriu jerál no tékniku vokasionál. No, ha’u fiar katak mekanizmu sira-ne’e bele lori rezultadu di’ak iha prosesu sira hotu,” nia dehan.
Jornalista : Tomé Amado
Editór : Cancio Ximenes
