iklan

DILI, POLÍTIKA

PN aprova votu pezár ba falesimentu Monseñor José António

PN aprova votu pezár ba falesimentu Monseñor José António

Imajen/Espesial

DILI, 09 janeiru 2023 (TATOLI)—Parlamentu Nasionál (PN), segunda ne’e, liuhosi reuniaun plenária aprova votu pezár ba falesimentu Monseñor José António da Costa hodi hato’o profundu sentidu kondolénsia ba matebian no família.

“Rezultadu votasaun ba votu pezár a-favór 50, kontra 0 no abstensaun 0. Ho nune’e, votu pezár númeru 27/2023 aprovadu,” Prezidente Parlamentu Nasionál Interinu no Atuál Vise Prezidente PN, Maria Angelina Sarmento, hato’o iha sala plenária PN.

Deputadu proponente ba votu pezár ne’e aprezenta hosi Cornelio Gama ‘L7’ (PLP), Olinda Guterres (KHUNTO), Lídia Norberta (FRETILIN) no António da Conceição ‘Kalohan’ (PD).

Tuir karta ne’ebé sekretáriu meza PN lee sai votu pezár ne’e, Monseñor José António hakotu iis iha loron 28 dezembru 2022. Monseñor moris iha loron 04 fulan maiu 1940 iha Fatu-Belak, suku Fatu-Kahi, postu administrativu Fatuberliu, munisípiu Manufahi, no oan hosi António da Costa ho Etelvina da Costa.

Frekuenta eskola ensinu primáriu iha Soibada (1949-1955), Semináriu Menór iha Dare (1955-1960), Semináriu Maiór no kursu filozófiku iha Dare no Macau (1960-1963), lisensiatura iha teolójia iha Macau (1963-1967), no lisensiatura direitu kanóniku iha universidade Gregoriana iha Roma (1971-1973).

Monseñor José simu ordenasaun presbiteral iha Fátima-Portugál iha 1967, ezerse misaun pastorál hanesan Vigáriu Kooperadór iha Bobonaro 1968, no paróku Katedrál  iha Dili desde 1993 to’o hakotu iis.

Dezempeña simu mós kargu eklesiástiku hanesan profesó iha Semináriu Menór iha Dare 1970-1973, Chanceler Kámara Eklesiástiku Dioseze Dili 1974-1993, prokuradór jerál/ekonómiku iha dioseze Dili 1975, diretór sekretáriadu eskola katólika 1983-1985, vigáriu jerál dioseze Dili 1993-2003, vigáriu jerál arkidioseze Dili desde 2016.

Durante okupasaun Indonézia, Monseñor José asume mós kargu oioin la’ós eklesiástiku hanesan xefe servisu edukasaun Timor-ensinu primáriu, xefe kruz vermella Indonézia, koordenadór organizasaun naun-governamentál, hanesan membru konsellu nasionál durante administrasaun UNTAET, hanesan mós membru klero Timor-Leste. Durante okupasaun Indonézia Monseñor apoiu povu timoroan nia luta rezisténsia.

Iha 1986, akompaña Dom Carlos Filipe Ximenes Belo enkontru klandestinu ho Xanana Gusmão iha Fatumaca, inklui kontribuisaun sira seluk.

Deputada Lídia Norberta, fundamenta votu pezár ida-ne’e liuhosi koñesimentu ne’ebé iha hanesan amo ida-ne’ebé iha ninia karátrr to’os maibé hanorin buat barak ba sarani sira.

“Ko’alia perspetiva hosi sarani nian, ami hanoin katak dioseze tolu atu antes harii, esforsu ne’ebé amu halo hodi kontribui ba dioseze liu-liu igreja kadetrál Dili tanba iha primeiravés igreja katedrál ne’ebé so ho vigáriu ida iha koñesimentu kona-ba sekuénsia liturjíku sira mak instala buat hotu-hotu ho loloos. Amu José António iha karáter no kapasidade boot ba ida-ne’e, iha mós buat seluk ne’ebé halo iha munisípiu,” nia dehan.

Bainhira hala’o atividade igreja buka oinsá apoiu direitu ema timoroan nian liuhosi kauza luta indepedénsia.

Tanba ba PN atu fó omenajen bootliu hosi votu pezár ida-ne’e ba partisipasaun amu nian ba iha igreja katólika no mós ba iha kauza ukun an nian.

Deputadu Kalohan hateten, aktu ida-ne’ebé merese atu Parlamentu Nasionál (PN) hanesan órgaun reprezentativu fó Monseñor foin falesidu liu ba.

“Monseñor rekoñese amu hanesan figura firme, ema ida metódiku iha nia servisu, ema ida formadór, ema ida ezije responsabilidade makaas ba sira-ne’ebé la’o ho nia. Ida-ne’e nia halo no hatudu duni iha ninia servisu la’o liu iha Esternato São José, semináriu, parókia no asume kna’ar boot iha dioseze ninian, ne’ebé fó duni nia asisténsia ekliziástika. Ho ida-ne’e merese tebes ita sira-ne’e fó votu pezár,” nia hateten.

Notísia Relevante: Padre José António da Costa hakotu ona iis iha HNGV

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!