DILI, 09 janeiru 2023 (TATOLI)—Prezidente Repúblika (PR), José Ramos Horta, lamenta ho invazaun hosi apoiante eis Prezidente Repúblika Federativa Brazíl, Jair Bolsonaro bá Kongressu Nasionál, Supermu Tribunál no Palásiu Planaltu iha Brazilia.
“Ho preokupasaun no konsternasaun kle’an, toma nota, eventu barbaru, asaltu violentu ba instituisaun demokrátika Brazileira, hosi apoiante eis Prezidente Bolsonaro ne’ebé daudaun ne’e sai refujiadu iha Estadu Unidu,” Xefe Estadu ne’e hateten relasiona ho situasaun polítika iha Brazíl, liuhosi komunikadu imprensa ne’ebé Agência Tatoli asesu, segunda ne’e.
Asaun ne’e, tuir Xefe Estadu, hanesan mós invazaun apoiante hosi eis Prezidente Estadu Unidu Amérika, Donald Trump bá Capitolio iha fulan-janeiru tinan 2021, tanba la konkorda ho rezultadu eleisaun ne’ebé fó vitória ba atuál Prezidente Estadus Unidus, Joe Biden.
“Fó lembra katak asaltu ne’ebé organiza hosi eis Prezidente Donald Trump, ba instituisaun aas liu simbólika no demokrásia Brazileira, kongressu amerikanu ne’ebé ha’u pesoalmente koñese di’akliu, iha tinan barak nia laran ba servisu no moris ho instituisaun amerikana antiga ne’e, hanesan “copy paste” bá saida mak akontese iha Washington, Estadu Unido Amérika hosi apoiante eis Prezidente Bolsonaro ne’ebé ho konsidénsia iha hela Florida, Estadu Unidu,” Horta hateten.
Ba Laureadu Prémiu Nobel da Páz ne’e, asaun violenta ne’ebé akontese iha Brazíl, ema hotu tenke kondena no rezeita.
“Ne’e aktu gravidade estrema, ne’ebé ita hotu, nasaun CPLP, Uniaun Europeia, nasaun demokrátiku hotu iha mundu, Nasaun Unida no ita hotu, tenke rezeita totalmente no kondena makaas,” nia dehan.
Entretantu, Prezidente Repúblika, José Ramos Horta, partisipa iha serimónia pose ba Prezidente Luís Inácio Lula da Silva iha loron 01 fulan-janeiru tinan ne’e iha Brazilia.
Notísia Relevante: PR Horta partisipa serimónia fó pose ba prezidente Brazíl
Jornalista : Nelson de Sousa
Editór : Cancio Ximenes
