DILI, 10 janeiru 2023 (TATOLI)—Ahi-han uma sira iha merkadu Taibesi, iha meiu dia, tersa ne’e, deskonfia tanba sirkuitu liña eletrisidade.
Sasin, Nunes Godinho Ximenes, haktuir kronolojia akontesimentu, tanba iha ema balun mak nono bee uza mákina maibé la tau atensaun.
“Akontesimentu ahi-han iha merkadu ne’e iha tuku 12:45, kauza ne’e maihosi ami-nia viziñu ne’ebé nono bee uza buli maibé tanba nia la kontrola, bee nakali to’o maran tiha, entaun fiu buli nian nabeen to’o hada’et ba liña eletrisidade no ahi-han uma to’o da’et ba uma sorin sira iha merkadu,” sasin haktuir iha Merkadu Taibesi.
Maski nune’e, abitante iha fatin akontesimentu konsege salva malu, tanba ne’e laiha ema ruma mak hetan kanek maibé la konsege salva sasán tanba ahi lakan boot.
“Ha’u-nia sasán ne’ebé hetan estragu mak laptop, dokumentu balun inklui sasán sira seluk mak la aproveita hotu tanba ami salva-an de’it, la hanoin atu salva sasán. Fatin ne’ebé ami hela bá ne’e atu buka moris hanesan loke obralan, kios kiik no seluk tan,” nia akresenta.
Notísia relevante: Jestór merkadu Taibesi preokupa vendedór la obedese ba regra merkadu
Nune’e, vítima sira husu Governu atu ajuda materiál konstrusaun no sasán ruma ne’ebé presiza.
Hafoin rona akontesimentu ne’e, Prezidente Autoridade Munisípiu Dili, Guilhermina Filomena Saldanha, to’o kedas iha fatin hodi observa situasaun.
“Ita-nia vendedór ne’ebé ahi-han uma, parte Autoridade Munisípiu Dili sei la taka matan, agora parte bombeiru hamate ona ahi, ita hamutuk ho jestór merkadu sei halo levantamentu dadus hodi hatene venvedór hira mak nia uma ahi-han. Bainhira levantamentu dadus hotu ona mak Autoridade sira sei fó apoiu hanesan fó konsulta saúde, nesesidade bázika, no materiál kontrusaun hodi halo manutensaun ba vítima sira-nia hela fatin,” nia tenik.
Hafoin observa iha fatin akontesimentu, Prezidente Autoridade seidauk bele fó komentáriu kona-ba kauza inséndiu tanba sei iha prosesu investigasaun nia laran.
“Ha’u labele dehan ahi-han merkadu ne’e tanba deskonfia vendedór dada ahi ilegál, tanba agora prosesu investigasaun la’o hela, maibé ita bele hatene katak merkadu ne’e dezorganizadu ne’e mós bele akontese ahi-han uma, maibé atu hatene klaru ne’e liuhosi investigasaun,” nia salienta.
Iha biban ne’e, Prezidente Autoridade husu ba vítima sira, karik balun nia dokumentu importante ruma ahi-han, bele fó hatane autoridade kompetente atubele hetan fali dokumentu.
Durante akontesementu ne’e, parte bombeiru to’o kedan iha lokál hodi halo atuasaun.
“Ami rona hosi komunidade katak ahi-han merkadu tanba sirkuitu eletrisidade, entaun ami ho ekipa rua tun kedas hodi halo atuasaun hamete ahi, nune’e labele da’et tan ba sira seluk,” Guilhermina Filomena haktuir.
Jornalista : Arminda Fonseca
Editora : Julia Chatarina
