DILI, 10 janeiru 2023 (TATOLI)—Bee Timor-Leste, Empreza Públika (BTL, E.P), tersa ne’e, kontrata empreza tolu hodi hadi’a sistema bee-moos hodi fornese ba komunidade iha munisípiu Liquiçá no Viqueque.
“Ha’u husu ba empreza tolu, bainhira fila bá ida-idak ninia munisípiu tenke serbisu ho resposabilidade nune’e bele fornese bee-moos ba ita-nia komunidade iha tinan foun ida-ne’e,” Prezidente Konsellu Administrasaun BTL, E.P, Carlos Peloi dos Reis, hateten iha salaun BTL, E.P, Caicoli.
Empreza tolu mak hanesan Timorindo Unipessoal, Lda sei halo projetu melloramentu sistema bee-moos hodi fornese ba aldeia Laline, suku Dilór, postu administrativu Lacluta Vila, munisípiu Viqueque ho kustu projetu $797.487,57, Quinta das Flores Unipessoal Lda sei halo projetu konstrusaun sistema bee-moss iha postu administrativu Maubara Vila, munisípiu Liquiçá ho kustu $559.587,21 no Kuapali Unipessoal Lda halo pakote fornesimentu no instalasaun tanke liner pré-fabrikadu ba komunidade iha postu administrativu Maubara Vila ho kustu $340.613,83.
“Hosi empreza tolu ne’e, ba Lacluta sei benefisia uma-kain 693 ho totál populasaun 4.158 no ba Maubara Vila benefisia uma-kain 372 ho populasaun 2.232. Kontratu ho durasaun fulan-neen, ne’ebé espera empreza sira bele finaliza lalais,” nia akresenta.
Notísia relevante: BTL, E.P tau prioridade kapitál postu administrativu 48 bele asesu bee-moos
Iha fatin hanesan, Diretór Timorindo Unipessoal Lda, Jorge Henrique, komprometidu sei halo serbisu tuir kontratu ho durasaun ne’ebé determina ona.
“Ami sei halo esforsu atu finaliza tuir tempu ne’ebé iha tanba ami-nia fatin komunidade presiza bee-moos,” Jorge Henrique dehan.
Nune’e mós, Administradór postu Maubara Vila, Deonísio Usnaat, agradese ba BTL, E.P tanba bele tau fiar ba emprezaa rua hosi Liquiçá atu fornese bee-moos ba komunidade.
“Ha’u kontente tebes tanba liuhosi asina akordu ne’e komunidade bele hetan bee-moos, nune’e husu ba empreza sira atu serbisu ho larantomak hodi serví ita-nia nasaun,” nia tenik.
Jornalista : Arminda Fonseca
Editora : Julia Chatarina
