Diretór ESG UNAMET husu MEJD deside lalais uniforme ba estudante sira
DILI, 10 janeiru 2023 (TATOLI)–Diretór Eskola Ensinu Sekundáriu Jerál (ESJ) 4 Setembru UNAMET Balide, Martinho Menezes. ezije ba Ministériu edukasaun Juventude no Desportu atu deside lalais uniforme ba estudante sira, atu nune’e labele difikulta eskola hodi kontrola estudante sira.
Notísia Relevante: ESG 4 Setembru Balide simu estudante 80-resin hosi munisipiu
“Ita-nia Governu liuhosi MEJD hatún ona sirkulár ba eskola hotu iha territóriu nasionál katak tinan ida-ne’e eskola ho inan-aman sira labele suku farda ba estudante sira tanba MEJD iha ona planu atu deside kór no modelu uniforme nasionál ba estudante sira,” Martinho Menezeshateten ba Agência Tatoli iha nia servisu fatin eskola 4 Setembru Balide, tersa ne’e.
Maibé, nia dehan, to’o agora parte eskola seidauk simu informasaun ida hosi Ministériu Edukasaun kona-ba desizaun farda nasionál ne’ebé Ministériu planea ona.
Tanba ne’e, parte eskola ezije ba MEJD karik seidauk iha preparasaun di’ak, entaun tinan ida-ne’e husik lai eskola ho inan-mana sira mak prepara farda ba estudante sira, nune’e ministériu bele halo preparasaun ba futuru.
“Ha’u hakarak husu de’it ba ministériu edukasaun karik tinan ida-ne’e mak seidauk iha preparasaun entaun husik eskola ho inan-aman sira mak prepara lai, tinan oin mai maka Ministériu bele deside fali atu nune’e bele iha preparasaun ida di’ak liu,” nia dehan.
Tuir nia, estudante sira iha eskola UNAMET Balide tinan ida-ne’e sei uza hela farda hosi eskola ida-idak nian hodi hein desizaun Ministériu nian.
Nia haktuir, eskola kontinua obedese ba desizaun MEJD nian maibé eskola mós konsidera katak MEJD tarde liu atu foti desizaun ba asuntu sira-ne’e
Tanba, asuntu kona-ba uniforme nasionál ne’e kuandu MEJD la tau iha konsiderasaun ba futuru bele hamosu problema iha kada eskola sira, tanba defisil eskola sira atu identifika estudante mak ne’ebé no ema li’ur mak ne’ebé tanba estudante 4 setembru barak liu no oinsá atu kontrola hosi dadeer to’o lorokraik.
“Ami-nia moru eskoll hosi parte kotuk mós laiha komunidade hela iha eskola kotuk mós tama sai hosi eskola ne’e, entaun difikulta eskola atu halo kontrola. Tanba ne’e, ami hakarak farda ne’e mak tenke lalais atu fasil ba ami bele halo kontrola,” nia dehan.
Diretór eskola Ensinu Báziku Central (EBF) Metinaro, Duarte Amaral, hateten sira iha ona desizaun katak bainhira MEJD la prepara lalais uniforme ba estudante sira, bainhira atividade orientasaun hotu sira sei deside la halo prosesu ensinu aprendizajen.
“Ami hein hela kuandu orientasaun hotu mak MiEJD seidauk foti desizaun atu suku farda foun ba estudante sira ami sei deside la kontinua halo atividade aprendizajen ba estudante sira tanba ami lakohi foti risku,” nia hateten.
Jornalista : Tomé Amado
Editór : Cancio Ximenes
