DILI, 10 janeiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, informa lansamentu abertura ba resensiamentu eleitorál no atualizasaun baze dadus iha territóriu nasionál ne’e sei hala’o iha 17 janeiru no sei rejistu simultaneamente.
Notísia Relevante: STAE-Embaixadór sira diskute implementasaun medida foun eleisaun lejislativa
“Ita sei lansa abertura ba resensiamentu eleitorál no atualizasaun baze dadus iha loron 17 janeiru 2023, no rejistu ne’e ita sei halo simultaeamente iha territóriu nasionál,” Acilino Manuel Branco hateten ba Agência Tatoli, liuhosi telefónika, tersa ne’e.
Iha abertura ne’e sei envolve Komisaun Nasionál Eleisaun (CNE), partidu polítiku sira iha Timor-Leste, Prezidente Autoridade Munisípiu no Administradór sira, Polísia Nasionál Timor-Leste (PNTL) no xefe suku sira.
Númeru eleitór to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiça 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Nune’e, eleitór ne’ebé agora resensiadu no atualizadu iha diáspora nian hamutuk 6.944 ne’ebé kompostu hosi Austrália iha eleitór hamutuk 1.462, Korea Súl 1.237, Irlandia do Norte 2.185, Portugál 1.241 no Reinu Unidu iha eleitór hamutuk 819.
Jornalista : Osoria Marques
Editór : Cancio Ximenes
