STAE-Embaixadór sira diskute implementasaun medida foun eleisaun lejislativa
DILI, 10 janeiru 2023 (TATOLI)–Diretor Jerál Sekretariadu Tékniku Administrasaun Eleitorál (STAE), Acilino Manuel Branco, hateten iha virtual meeting ne’e sei ko’alia kona-ba implementasaun medida votasaun foun ba eleisaun lejizlativa iha rai-li’ur liuliu postal voting hosi implementasaun medida foun no atualizasaun baze dadus inklui sensu eleitorál.
Notísia Relevante: Aban, STAE halo “virtual meeting” ho embaixadór-konsuladu iha diáspora
Objetivu atu implementa medida foun sira hodi aumenta taxa partisipasaun nian no garante direitu votu nian ba timoroan sira liu-liu sira-ne’ebé hela iha rai-li’ur.
Órgaun eleitorál sira aprezenta ona iha 18 novembru 2022, medida foun tolu ba Prezidente Repúblika hanesan urna eletróniku ba votasaun sira, estasaun votasaun sira no votasaun antesipada.
“Ami hakarak implementa estasaun votasaun barak liután iha rai-li’ur, tanba ami iha referénsia di’ak iha nasaun oioin atu garante direitu ba vota ba votante sira. Tanba ne’e, enkontru ne’e sei diskute kle’an liután hodi implementa sasukat foun ne’e ho susesu, ” nia hateten ba Agência Tatoli, iha nia servisu fatin, Caicoli, tersa ne’e.
Nia dehan, halo ida-ne’e tanba presiza alokasaun orsamentu no tempu ne’ebé dook hodi labele prejudika kalendáriu eleisaun lejizlativa sira iha rai-li’ur.
Medida foun ne’e sei aprezenta sorumutuk Konsellu Ministru nian no esplika medida foun ne’e ba deputadu sira atu fó aprovasaun.
Tanba, nia dehan, antes ne’e Prezidente Repúblika, Jose Ramos Horta, husu ba órgaun eleitorál sira atu aumenta taxa partisipasaun timoroan sira-ne’ebé hela iha rai-li’ur.
Notísia Relevante: STAE sei estabelese sentru paralelu iha eleisaun parlamentár 2023
Jornalista : Osoria Marques
Editór : Cancio Ximenes
