BOBONARO, 10 janeiru 2023 (TATOLI) — Bee Timor-Leste, Empreza Públika (BTL,E.P) iha munisípiu Bobonaro, hahú hosi fulan janeiru to’o dezembru tinan 2022 rekolla reseita hamutuk $35,757.69 hodi hatama ba kofre estádu.
Tuir dadus hosi diresaun administrasaun finansa, departamentu apoiu kliente tabela reseita iha fulan-janeiru konsege rekolla $3,352.40, fevereiru $3,038.00, marsu $1,556.40, abríl $1,859.60, maiu $3,110.95.
Nune’e mós fulan-juñu $3,262.40, jullu $4,343.99, agostu $3,437.00, setembru $1,968.45, outubru $4,013,40, novembru $1,781.75 no fulan-dezembru $4,039.35.
Fonter eseita hirak-ne’e BTL,E.P rekolla mai hosi implementasaun tarefa liuhosi monta metru kontadór ba kliente-sira no mós instala bee-moos ba uma-kain sira iha área urbana.
Hafoin halo instalasaun no monta kontadór ba uma-kain sira to’o fulan kliente sira selu direta iha edifísiu BTL,E.P, hafoin funsionáriu sira lori osan ba rai iha Banku Nasionál Komérsiu Timor-Leste (BNCTL).
Koordenadór BTL,E.P Munisípiu Bobonaro, Adriano da Cruz, informa BTL kontinua esforsa melora sistema bee-moos hotu hodi halo atendimentu ba kliente sira kada loron.
Notísia relevante: BTL,EP Bobonaro sei mellora sistema bee-moos ho kualidade
“Ita-nia kna’ar ne’e kontinua garante no asegura bee ne’e ba komunidade 24 oras, maske balu seidauk selu,” nia informa ba jornalista sira, iha Soso, Maliana, segunda ne’e.
Nia dehan, kliente sira mós labele ejize de’it sira-nia direitu atu asesu bee-moos, maibé importante liu mak tenke iha responsabilidade hodi kumpre devér selu taxa ba estadu, nune’e fornesimentu bee-moos bele la’o di’ak liután.
“Ita labele hanoin de’it buat hotu tenke gratuita, maibé ita tenke kontribui oituan ba ita-nia nasaun, tanba nasaun ne’e atu moris, dezembolve ho di’diak depende ba ita hotu nia kontribuisaun, entaun ita ejize ita-nia direitu ita mós tenke kumpre devér, buat rua ne’e tenke la’o hamutuk,” nia apela.
Maske nune’e Adriano mós rekoñese,foin lalais akontese udan-boot sistema gravitasaun Lugululi hetan estragu, impaktu hosi rai-halai rezulta tanki atu mout, tanba ne’e BTL rekoñese fornesimentn bee-moos ba komunidade sira ladún di’ak.
Maibé tékniku no operadór sistema sira halo ona normalizasaun hodi troka pipa liña distribuisaun, transmisaun no mangera, ne’ebé to’o oras ne’e distribuisaun bee ba kliente sira kontinua la’o normál.
Koordenadór Adriano apela ba kliente sira labele fiar informasaun ne’ebé ema balu lansa katak BTL Munisípiu Bobonaro bee iha fatin barak la-sai tamba menus halo kontrolu sistema sira ne’ebé estabelesae ona.
“Komunidade ne’ebé pasa informasaun ba mídia ne’e matan delek, nia la haree ema-nia serbisu, maibé dalaruma nia ida halo komentáriu ne’e la kumpre obrigasaun selu taxa ida, tanba ne’e di’ak liu bee la sai mai hato’o keixa iha BTL nune’e tékniku sira ba hadi’a, la’ós halo komentáriu de’it iha mídia,” nia fó hanoin.
Nia haktuir, kliente sira iha suku Ritabou, parte Ex Kodim no perumahan besik liña distribuisaun to’o parte aldeia Samelaun ladún hetan bee, kauza hosi sistema distribuisaun pipa sira-ne’e antigu.
Notísia relevante: BTL, E.P inisia fornese bee-moos ba komunidade Bobonaro no Covalima
Jornalista : Sérgio da Cruz
Editór : Evaristo Soares Martins
