DILI, 07 novembru 2022 (TATOLI)—Bee Timor-Leste, Empreza Públika (BTL, E.P), segunda ne’e, asina akordu ho empreza rua hanesan Soreira Unipessoal Lda no Roman Junior Unipessoal Lda, hodi fornese bee-moos ba komunidade iha munisípiu Bobonaro no Covalima.
“Ha’u husu empreza rua, fila ba ida-idak ninia munisípiu tenke serbisu ho resposabilidade nune’e bele fornese bee-moos ba ita-nia komunidade,” Prezidente Konsellu Administrasaun BTL, E.P, Carlos Peloi dos Reis, hateten iha salaun BTL, E.P, iha Caicoli.
Empreza Roman Junior Unipessoal Lda sei halo konstrusaun sistema bee-moos ba uma-kain 210 ho totál populasaun 1.260 iha aldeia lima iha suku Fohoren, postu administrativu Fohoren, munisípiu Covalima, ho kustu projetu $498.134,62, enkuantu empreza Soreira Unipessoal Lda sei halo melloramentu ba sistema bee-mos ba uma-kain 325 ho totál populasaun 1.950 iha suku Meligo, postu administrativu Cailaco, munisípiu Bobonaro, ho kustu projetu $242.622,53.
Notísia relevante: BTL, E.P kontrata empreza tolu mellora sistema bee-moos iha munisípiu haat
Empreza sira ne’ebé daudaun ne’e BTL, E.P kontratu ona halo hela melloramentu no konstrusaun ba sistema bee-moos ba nível kapitál postu administrativu sira hamutuk 24, empreza 22 sei iha hela prosesu aprovizionamentu no 14 sei halo levantamentu dadus.
Iha fatin hanesan, Diretór empreza Roman Junior Unipessoal Lda, José Amaral, hateten, komprometidu sei serbisu tuir akordu ne’ebé iha.
“Ita-nia akordu serbisu durante fulan-neen. Ita garante serbisu tuir alvu nune’e komunidade bele konsumu bee-moos, karik iha terrenu mak ami hasoru difikuldade ruma, ami sei koordena ho líder komunitáriu hodi rezolve,” nia dehan.
Jornalista : Arminda Fonseca
Editora : Julia Chatarina
