DILI, 14 outubru 2022 (TATOLI)—Bee Timor-Leste, Empreza Públika (BTL, E.P), sesta ne’e, kontrata tan empreza tolu halo melloramentu ba sistema bee-moos no instala tanki liner iha munisípiu haat.
“Ha’u husu ba empreza sira tenke serbisu ho sériu hodi fornese bee-moos ba komunidade tanba bee no saneamentu importante ba ita-nia rai. Ha’u espera kooperasaun ne’e bele fasilita apoiu BTL hodi fornese bee ba komunidade,” Prezidente BTL, E.P hateten iha Caicoli, sesta ne’e.
Kontratu ho empreza Karisma Unipessoal Lda hodi halo melloramentu sistema bee-moos iha postu administrativu Vemasse, munisípiu Baucau, ho kustu $337.805,81.
Kontratu ho empreza Ukad Mape Goll Unipessoal Lda ba fornesimentu instalasaun tanki liner iha suku Mehara no Luro iha munisípiu Lautém, suku Quelicai iha munisípiu Baucau no suku Metinaro iha munisípiu Dili, ho kustu $339.889,37.
Notísia relevante: BTL sei promove melloramentu bee-moos iha kapitál postu administrativu
Kontratu ho empreza Mercy Unipessoal Lda ba sistema bee-moos iha suku Cribas, munisípiu Manatuto, ho kustu $255.585,95.
“Ha’u husu ba autoridade lokál sira iha terrenu atu ajuda BTL servisu hamutuk ho empreza sira hodi haree situasaun iha terrenu, nune’e servisu bele la’o di’ak tanba sei iha rezultadu ne’ebé komunidade mak sai benefísiu,” nia apela.
Iha fatin hanesan, na’in empreza Ukad Mape Goll, Domingos de Jesus, hateten, tuir kontratu sei halo instalasaun ba tanki liner ualu, iha suku Mehara ida, Luro ida, Quelicai lima no Metinaro ida.
“Hanesan empreza lokál, ami prontu atu koopera di’ak ho BTL no garante serbisu tuir kontratu ne’ebé iha, nune’e komunidade bele asesu bee-moos,” nia dehan.
Jornalista : Arminda Fonseca
Editora : Julia Chatarina
