DILI, 10 janeiru 2023 (TATOLI)—Prezidente Repúblika (PR), José Ramos Horta, tersa ne’e, konvoka reuniaun Konsellu Superiór Defeza no Seguransa (KSDS) iha Palásiu Prezidensiál Nicolau Lobato, Bairru Pite, Dili.
Notísia Relevante: Horta: Estadu presiza foti medida radikál ba kazu oho malu
Hafoin ramata enkontru, Xefe Kaza Militár Interinu Prezidénsia Repúblika, Majór Françisco da Silva, hateten enkontru ne’e ko’alia kona-ba kazu timoroan oho malu no sona kanek malu hanesan iha área Elemloi, ponte Habibie no seluk tan ne’ebé halo públiku preokupa ho situasaun seguransa.
“Rezumu hosi enkontru ligadu ho situasaun atuál loron rua ka tolu hanesan ita hotu hatene joven sira halo problema iha Dili hodi oho malu,” Xefe Kaza Militár Interinu ne’e hateten ba jornalista sira.
Durante reuniaun, membru KSDS hato’o rekomendasaun ba PR atu halo prevensaun ba problema sira-ne’ebé mak mosu iha pasadu no liu daudaun.
“Entaun Prezidente ho Primeiru-Ministru ko’alia atu halo prevensaun liuhosi mensajen ba sidadaun hotu labele tur hamutuk hemu tua kria problema,” nia dehan.
Ho ida-ne’e sidadaun hotu oinsá hakmatek iha uma hodi kontribui ba situasaun hakmatek ho ida-idak hala’o atividade ho seguru nia laran no movimentu livre.
Parte Governu sei ko’alia ho Komisaun Reguladora Arte Marsiál (KRAM) no lidér arte marsiál oinsá haree fila-fali regulamentu regula arte marsiál sira-nia atividade, ezemplu farda utiliza ba treinu loloos ba to’o iha fatin mak hatais la’ós hatais iha fatin públiku.
Durante enkontru, Prezidente Repúblika hato’o atu foti medida ba autór sira-ne’ebé prova envolve duni halo krime.
“Polísia buka hela dadus ba iha autór no la’ós jeneraliza arte marsiál hotu maibé refere liu ba indivídu. Organizasaun la hanorin elementu atu ba halo atuasaun krime maibé elementu indivídu ne’ebé halo problema. Prontu, bainhira polísia ka’er nia, tuir lei nia oho ema ka hakanek ba hatán aktu ne’ebé komete,” nia hateten.
Entertantu, reuniaun KSDS ne’e hala’o iha tuku 09h00 dadeer no teramina iha tuku 12h20.
Iha enkontru ne’e marka prezensa hosi Primeiru-Ministru (PM) Taur Matan Ruak, Ministru Prezidénsia Konsellu Ministru (PCM, siglá portugés) Fideils Leite, Ministru Justisa (MJ) Tiago Amarál, Deputadu David Dias Ximenes ‘Mandati’, Deputadu Adéritu Hugo, Xefe Estadu Maiór Jenerál FALENTIL-Forsa Defeza Timor-Leste (F-FDTL) Tenente Jenerál Falur Rate Laek, Komandante Jerál PNTL Komisáriu Faustino da Costa no dirijente Polísia Sientífika Investigasaun Kriminál (PCIC, siglá portugés) no Servisu Nasionál Intelijénsia (SNI).
Notísia Relevante: Ema deskoñesidu oho joven ida iha Elemloi
Jornalista : Nelson de Sousa
Editór : Cancio Ximenes
