DILI, 11 janeiru 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu proposta-lei, ne’ebé aprezenta hosi Vise-Ministru Administrasaun Estatál, Lino de Jesus Torrezão, ba alterasaun dalimak lei númeru 6/2006, loron 28 dezembru, kona-ba Lei Eleitorál ba Parlamentu Nasionál.
“Alterasaun ne’e hakarak introdús medida foun hodi aumenta partisipasaun demokrátika sidadaun timor-oan sira ne’ebé hela iha rai-li’ur, liuliu introdusaun ba votu postál ka alargamentu oráriu funsionamentu estasaun votu, matéria ne’ebé ninia regulasaun ne’e bazeia ba determinasaun konstitusionál hanesan rezerva lejizlativa,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu.
Diploma ne’e ho objetivu atu inkorpora iha Lei Eleitorál ba Parlamentu Nasionál, ho inovasaun sira ne’ebé introdús ona iha tinan-2021 iha Lei Eleitorál ba Prezidente Repúblika, hodi garante armonizasaun lejizlativa ne’ebé boot liu entre lei reguladora sira iha eleisaun órgaun soberania sira.
Notísia relevante: Komisaun A sei fó apresiasaun alterasaun lei eleitorál ba PN
Aleinde ne’e, inisiativa ne’e, inklui mós regra foun sira kona-ba oráriu funsionamentu sentru votasaun, lisensa ba jornalista iha servisu kobertura jornalístika eleisaun parlamentár nian, sira vota iha sentru votasaun ne’ebé besik liu iha sira-nia serbisu fatin, obrigatoriedade eleitór sira hodi identifika-aan bazeia ba dokumentu identifikasaun pesoál ne’ebé válidu, ka kriasaun figura monitór eleitorál ne’ebé ninia funsaun hanesan ho observadór eleitorál sira.
Norma balun mós hadi’a hodi klarifika katak iha asembleia apuramentu nasionál, Komisaun Nasionál Eleisaun (CNE, sigla portugés) deside ho definitivamente kona-ba votu nulu sira, elementu sira ne’ebé tau iha buletin votu inklui inkluzaun númeru orden hosi kada kandidatura no rezultadu hosi sorteiu lista kandidatura sira.
Aleinde ne’e, adota inovasaun prinsipál ida hosi eleisaun prezidensiál tinan 2021 hanesan sentru votasaun paralelu sira, maski ho forma foun, nune’e prevee atu instala sentru votasaun paralelu 13 iha Dili, ne’ebé ida-idak asosia ba munisípiu ida no ba Rejiaun Administrativa Espesiál Oé-cusse Ambeno (RAEOA).
Eleitór sé de’it ne’ebé inskreve ona iha unidade resensiamentu fora hosi Dili no ne’ebé lakohi atu ba vota iha ninia sentru votasaun orijinál rasik, bele inskreve iha sentru votasaun paralelu sira.
Komisaun A trata asuntu Justisa no Konstituisionál prepara halo audiénsia públika ho entidade relevante, desde dezembru 2022, ba alterasaun dalimak lei númeru 6/2006, loron 28 dezembru, kona-ba Lei Eleitorál, nune’e iha tempu badak sei hahú diskute.
Jornalista : Antónia Gusmão
Editora : Julia Chatarina
