DILI, 12 janeiru 2023 (TATOLI)–Ministra Saúde (MS), Odete Maria Freitas Belo, aprezenta opsaun polítika-lejislativa iha reuniaun Konsellu Ministru (KM), kuarta ne’e, hodi sai hanesan baze ba kriasaun rejime jurídiku komersializasaun substitutu susu-been inan nian.
“Inisiativa ne’e ho objetivu atu garante alimentasaun seguru no saudável ba labarik sira. Opsaun polítika-lejizlativa ne’ebé aprezenta permite regula komersializa produtu sira ne’e ho análiza ba ninia kompozisaun no regula publisidade ba produtu sira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, kuarta ne’e.
Notísia relevante: Susu-been inan proteje labarik sira-nia imunidade
Portavóz Governu dehan, pontu esensiál planu Governu maka fonte ai-han ba labarik sira hanesan susu-been inan tenke hatuur ho klaru. Nune’e mós karik presiza atu substitui hanesan komplementa ho susu-been sira seluk hanesan formula sira, tenke prienxe rekezitu hosi MS.
“Tanba iha ita-nia rain, susu-been barak ho kompozisaun viola rekezitu saúde tanba laiha nutrisaun,” nia akresenta.
Tanba ne’e, objetivu prinsipál hosi proposta dekretu-lei ne’e hodi inklui iha esforsu jerál Governu atu hadi’a investimentu iha ema no hadi’a kualidade moris timor-oan sira, liuliu nível má-nutrisaun labarik sira ne’ebé kontribui ba problema sira hanesan rais badak ne’ebé kontinua sai preokupasaun iha nasaun.
Jornalista : Antónia Gusmão
Editora : Julia Chatarina
