DILI, 11 janeiru 2023 (TATOLI)—Prezidénsia Repúblika, tersa (10/01/2023) ne’e, hala’o asaun karidade hodi fó apoiu nesesidade bázika ba família vulnerável hamutuk 50 iha munisípiu Manufahi no Manatuto.
Notísia Relevante: Prezidénsia Repúblika apoiu nesesidade bázika ba família 24 iha Tibar
“Ne’e inisiativa hosi Xefe Estadu José Ramos Horta, hahú kedas iha natál ho povu iha 21 dezembru 2022 liu ba, ho apoiu tomak hosi setór privadu sira. Iha munisípiu Manufahi, ba benefisiáriu hamutuk 25, kompostu husi inan-feto na’in 11 no mane na’in-14, avo feto ida ho mane iha mak iha kondisaun saúde krítiku, maske nune’e, hetan ona asisténsia sosiál hosi Ministériu Solidariedade Sosiál no Inkluzaun (MSSI),” Xefe Ekipa Palásiu Prezidente, Filomeno Lay, hateten liuhosi komunikadu imprensa ne’ebé Ajénsia TATOLI asesu, kuarta ne’e.
Benefisiáriu hosi aldeia Urufu, suku Holarua, postu administrativu Manufahi Vila, munisípiu Manufahi, Oscar Corte-Reál (idade 80), hato’o agradesimentu ba tulun hosi Prezidénsia Repúblika.
“Ha’u durante ne’e hela ho oan mane ida, ha’u katuas ona, halo toos mós labele ona. Ho sasán ne’e, mai ami kontente tebes. Obrigadu ba Prezidente Repúblika,” Oscar Corte Reál hateten.
Xefe aldeia Urufu, Francisco Tilman, apresia inisiativa hosi Prezidénsia Repúblika atu tulun sidadaun vulneravél iha área rurál.
‘’Ami agradese tebes ba Prezidente Repúblika nia laran luak mai ami nia povu iha aldeia Urufu. PR Horta hanoin duni nia povu iha área remota, ne’ebé oras ne’e presiza duni tulun,” Xefe aldeia ne’e hateten hateten.
Entretantu, ekipa Prezidénsia Repúblika mós distribui apoiu ba família 25, iha suku Ma’abat, munisípiu Manatuto.
“Prezidente Repúblika Horta sempre deklara iha públiku katak tenke iha sentídu umanízmu bootliu ba sidadaun vulnerável sira, liu-liu inan-feton no labarik sira iha área remota,” Xefe Ekipa Prezidénsia Repúblika, Filomeno Lay, hateten.
Família vulneravél sira identifikada hosi servisu sosiedade sivíl Prezidénsia Repúblika servisu hamutuk ho autoridade lokál, hodi haree sidadaun ne’ebé mak merese duni hetan apoiu.
Xefe suku Ma’abat, António da Silva, konsidera Prezidente Repúblika hatene kle’an povu nia sofrimentu, tanba ne’e deside tulun sidadaun sira, nune’e asaun karidade ne’e labele haree ba sasán ne’ebé oferese maibé haree ba sentidu domin.
Antes ne’e, Prezidénsia Repúblika hala’o ona asaun karidade iha munisípiu Bobonaro, Ermera, Dili no sei realiza tan iha munisípiu seluk.
Jornalista : Nelson de Sousa
Editór : Cancio Ximenes
