DILI, 11 janeiru 2023 (TATOLI)—Prezidente Konsellu Administrasaun Autoridade Nasionál Água no Saneamentu, Institutu Públiku (ANAS, I.P), Domingos Pinto, hateten, prosesu estudu viabilidade dada bee-moos hosi mota Gleno no Railaco, munisípiu Ermera, daudaun iha ona diskusaun ezbosu finál.
“Rezultadu relatóriu haruka ona ba ha’u no haree ona. Horiseik haruka ona ba Ajénsia Dezenvolvimentu Nasionál (ADN) atu haree, nune’e konvida fali empreza mai halo aprezentasaun atu haree pontu ruma ne’ebé presiza atu diskute no haree bainhira kompletu ona haruka sira fó relatóriu mai ita atu review no fó komentáriu iha relatóriu ne’e. Bainhira loos ona ita bele finaliza ona,” Prezidente Konsellu Administrasaun ANAS, I.P informa ba Agência Tatoli, iha ninia knaar fatin, Caicoli, kuarta ne’e.
Rezultadu estudu viabilidade tama ona iha ezbosu viabilidade finál, maibé nia prosesu kleur tanba nota katak iha asuntu balun la klaru, hanesan empreza ladún analiza didi’ak fornesimentu bee mai Dili.
Ho ida-ne’e prosesu ne’e kleur maibé molok tama tinan foun, ANAS, I.P bolu empreza na’in hodi hasoru atu husu hato’o relatóriu klaru, nune’e bele halo fali revizaun ba ezbosu estudu viabilidade finál.
Notísia relevante: Ezbosu estudu viabilidade dada-bee hosi Gleno-Railaco sei iha faze diskusaun
Nia dehan, bainhira relatóriu ne’e kompletu ona, ANAS, I.P sei submete ba ministériu relevante atu foti medida kontinuasaun maibé tanba relatóriu ikus empreza seidauk aprezanta, entaun ho razaun ne’e mak sei dada tanba investimentu sira hanesan ne’e tenke asegura kualidade.
“Empreza rasik promote iha fevereiru 2023 sira sei halo kompleta ezbosu viabilidade finál tanba agora iha faze draft finál, ne’e katak sira aprezenta mai mak ita konkorda ona mak sei ba finál ona, nia prosesu tuir mai mak ANAS, I.P sei rekomenda ba Ministériu Obra Públika mak sei foti asaun,” nia tenik.
Rezultadu ezbosu viabilidade dada bee ne’e rasik tanba iha tinan kotuk hafoin empreza fó sira-nia relatóriu no halo avaliasaun review ba ezbosu ne’e, nota katak iha pontu balun ne’ebé sira tenke halo klarifikasaun ka rekomendasaun klaru.
“Ita haree kona-ba fornesimentu bee-moos mai Dili, nune’e mós asuntu hydro power, tanba ita harii infraestrutura ne’e presiza halo dam, maibé agora utilizasaun hydro power rasik mós seidauk klaru didi’ak, kona-ba kapasidade no sira uza bee ne’e oinsá. Governu tenke hatene utilizasaun hodi hatene uza bee iha tempu udan ka bailoron, sira sei utiliza nafatin baze floor ida-ne’e mak seidauk klaru iha dokumentu estudu viabilidade no asuntu seluk ne’ebé seidauk klaru iha dokumentu mak kona-ba orsamentu analiza finanseiru viabilidade ekonómika,” nia tenik.
Nune’e, karik iha tinan ne’e mak empreza aprezenta rezultadu di’ak ona, ba oin sei entrega ba Ministériu Obra Públika (MOP) no nia prosesu konkursu públiku fahe ba parte rua hanesan konstrusaun no Dezeñu Detalladu, maibé agora foin iha estudu visibilidade.
Kustu investimentu atu dada bee hosi mota Gleno no Railaco hamutuk millaun $300 resin, enkuantu estudu viabilidade ho kustu $459.600.
“Hosi orsamentu ne’e ita foin selu 15% ba empreza, maibé agora sira aprezenta tan relatóriu mak kompletu ona, ita foin selu 50% no tinan oin mak foin selu hotu,” nia dehan.
Jornalista : Arminda Fonseca
Editora : Julia Chatarina
