iklan

NASIONÁL, HEADLINE, KAPITÁL

Ezbosu estudu viabilidade dada-bee hosi Gleno-Railaco sei iha faze diskusaun

Ezbosu estudu viabilidade dada-bee hosi Gleno-Railaco sei iha faze diskusaun

Prezidente Konsellu Administrasaun ANAS, I.P, Domingos Pinto. Imajen Tatoli/Egas Cristóvão

DILI, 13 setembru 2022 (TATOLI)—Prezidente Konsellu Administrasaun Autoridade Nasionál Água no Saneamentu, Institutu Públiku (ANAS,I.P), Domingos Pinto, hateten, prosesu estudu viabilidade dada bee hosi mota Gleno no Railaco, munisípiu Ermera iha ona ezbosu viabilidade finál.

“Estudu viabilidade ne’e agora iha ona ezbosu viabilidade finál maibé hafoin ita haree, nota katak iha asuntu balun la klaru mak hanesan empreza ladún análiza didi’ak ka espesífiku ba fornesimentu bee mai Dili,” Prezidente ANAS, I.P informa ba Agência Tatoli, iha ninia knaar fatin, Caicoli, tersa ne’e.

Tanba ne’e, Governu sei konvida fali empreza DONSUN ne’ebé toma-konta ba estudu viabilidade, atu halo diskusaun hodi aprezenta didi’ak ba Governu.

“Ita haree kona-ba fornesimentu bee-moos mai Dili, nune’e mós asuntu hydro power, tanba ita konstrui infraestrutura ne’e presiza halo dam, maibé agora utilizasaun hydro power ne’e rasik mós seidauk klaru didi’ak, kona-ba kapasidade no sira uza bee ne’e oinsá. Governu tenke hatene utilizasaun hydro power hodi hatene uza bee ne’e iha tempu udan ka bailoron, sira sei utiliza nafatin base floor ida-ne’e mak seidauk klaru iha dokumentu estudu viabilidade ne’e,” nia akresenta.

Notísia relevante: Estudu viabilidade bee hosi Gleno-Railaco tama ona faze finál

Asuntu seluk ne’ebé seidauk klaru iha dokumentu mak kona-ba orsamentu análize finanseiru viabilidade ekonómika.

“Iha setór balun haree katak estimasaun ida-ne’e seidauk klaru. Ita tenke hatene tanba ita sei halo investimetu. Ita-nia retornu ne’e mai filafali iha tinan hirak nia-laran, ida-ne’e tenke klaru. Tanba ne’e ami hanesan ekipa hamutuk ho Ajénsia Dezenvolvimentu Nasionál (ADN), Grande Projetu, inklui sira seluk, hamutuk konkorda katak empreza ne’e presiza mai fali halo aprezentasaun dala-ida kona-ba ezbosu finál,” nia tenik.

Orsamentu ba investimentu atu dada bee hosi hosi mota Gleno no Railaco ho kustu millaun $300 resin, enkuantu ba estudu viabilidade ho kustu $459.600.

“Ho razaun sira ne’e maka maski estudu ne’e rasik tarde maibé di’ak liu ita asegura kualidade, tanba ida-ne’e interese Estadu, estudu sira hanesan ne’e presiza han tempu naruk tanba ita presiza haree didi’ak asuntu tékniku, finansa, no ambiente atu nune’e bainhira estudu hotu iha rekomendasaun forte no Governu sente seguru atu implementa projetu,” nia dehan.

Tuir Prezidente ANAS, I.P, estudu viabilidade ne’e rasik hanesan faze ne’ebé atu iha serteza katak hosi aspetu sira laiha problema maibé atu tama dada bee ne’e sei han tempu naruk.

“Estudu viabilidade ne’e hotu tiha, ANAS,I.P sei aprezenta rezultadu ba Ministériu Obra Públika (MOP),” nia salienta.

Daudaun ne’e, instituisaun Estadu ne’e komunika ona ho parte empreza maibé jerente sira iha hela Koreia.

“Ami tenta sira bainhira fó resposta halo klarifikasaun lalais ha’u sente bele ramata iha tinan ne’e, maibé depende ba empreza konsultór. Tanba tarde ne’e hosi sira-nia parte mak fó resposta,” nia informa.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!