DILI, 11 novembru 2021 (TATOLI)–Prezidente Konsellu Administrasaun Autoridade Nasionál, Água no Saneamentu, Institutu Públiku (ANAS, I.P), Domingos Pinto, informa, prosesu estudu viabilidade kona-ba dada bee hosi mota Gleno no Railaco, munisípiu Ermera mai kapitál Dili, daudaun tama ona faze finál.
“Ita iha kompromisu atu koko ko’alia ho kompañia, se bele finaliza lalais iha tinan ne’e, tanba kompañia aprezenta ona estudu viabilidade ne’e mai ANAS.I.P, maibé ita haree no fó komentáriu balun ba sira hodi halo revizaun lalais mak submete fali mai,” Prezidete ANAS. I.P hateten ba Agência TATOLI, iha Otel Novo Turismo, kinta ne’e.
Kompañia ne’ebé durante ne’e halo estudu viabilidade ba mota Gleno-Railaco mak kompañia internasionál DONSUN hosi Korea.
Nune’e, autoridade ne’e husu ba kompañia tenke haree uluk ba maioria bee nia kapasidade, tanba sai hanesan fonte adisionál ba Dili, tanba ne’e hakarak hatene bee ne’e viável ou lae.
“Komentáriu ne’ebé fó ba kompañia, tenke haree hosi kestaun fornesimentu bee-moos tanba ita hakarak hatene bele ka lae bee ne’e uza hanesan hydropower no ita hakarak hatene estudu ne’ebé halo ne’e bele ka lae, ekonomikamente no finansialmente ne’e viável, ida-ne’e mak ita hakarak hatene no komentáriu sira ne’ebé ita fó esplikasaun ne’e tenke klaru iha relatóriu estudu ne’e,” nia dehan.
Notísia relevante: MOP Sei Avalia Relatóriu Estudu Viabilidade ba Projetu Dada Bee Husi Mota Railaco
Razaun atu lori bee hosi Gleno no Railaco tanba populasaun iha sidade Dili 70% uza bee rai-okos no 30% mak uza bee rai-leten.
Liuhosi estudu viabilidade ne’e, ANAS I.P hamutuk ho Ajénsia Dezenvolvimentu Nasionál Institutu Públiku (ADN, I.P) ho parte relevante seluk haree di’ak ona tanba responde ona ba termu referénsia ne’ebé Governu fó.
“Maibé hakarak sira-nia relatóriu ne’e hakerek fiksu ba asuntu hanesan ekonomikamente no rekursu viável atu fornese bee, tanba ne’e hanesan investimentu boot ne’ebé Governu hakarak implementa,” nia dehan.
Jornalista : Arminda Fonseca
Editora : Julia Chatarina
