BAUKAU, 11 Maiu 2026 (TATOLI)—Autoridade Suku Fatulia, Postu Administrativu Venilale, deside kontinua reabilita estrada diresaun Aldeia Uaitobono bá sede suku iha tinan ne’e liuhusi atividade regulár Programa Nasionál Dezenvolvimentu Suku (PNDS).
Xefe Suku Fatulia, Angelino Moises Perreia, esplika desizaun referida foti liuhusi reuniaun konsellu suku iha-ne’ebé kontinua hakarak finaliza reabilitasaun estrada rurál diresaun Uaitobono tanba bazeia ba alokasaun orsamentu PNDS kada tinan.
“Ita kontinua fali nune’e bele termina to’o sede suku,” Xefe Suku Fatulia hateten iha edifísiu Administrasaun Munisipál Vila Nova, Baukau, Segunda ne’e.
Angelino Perreia relata prosesu hotu finaliza ona no tuir planu semana oin sei kontinua ba faze kuotasaun ho emprezáriu relasiona ho fornesimentu materiál antes hahú atividade regulár iha Fatulia.
Estrada referida iha tinan kotuk reabilita ba área risku hanesan cor beton nune’e tinan-ne’e sei kontinua ho distánsia kilómetru ida-resin ne’ebé sei aloka orsamentu hamutuk rihun $37-resin kompostu fundu infraestrutura rihun $32 no fundu operasionál hamutuk rihun $ 5-resin.
“Posivelmente fulan-ne’e bele hahú ona atividade,” Angelino Pereira akresenta.
Entretantu, Suku Fatulia hamutuk aldeia haat kompostu husi Bahadato, Osso-Uaque, Uatulia-ana no Uaitobono ho totál populasaun 2.721 husi uma-kain 688.
Jornalista: Natalino Belo
Editór: Xisto Freitas da Piedade
