DILI, 11 janeiru 2023 (TATOLI)—Ministru Obra Públika (MOP), Abel Pires, hateten, prosesu konkursu públiku ba projetu estrada urbana Maliana kuaze konklui.
“Konkursu públiku atu hotu ona, tanba dokumentu ka proposta tékniku ne’e loke ona semana oin. Bainhira proposta finanseiru loke tan, ita sei hatene empreza sé mak sai manán-na’in ba projetu,” Ministru hateten iha Palásiu Governu, kuarta ne’e.
Notísia relevante: CAFI sei aprova estrada urbana Maliana ho kilómetru 23
Nia dehan, bainhira konkursu públiku ne’e ramata ona, ninia prosesu kontinuasaun sei han tempu oituan tanba tenke hetan vistu hosi Kámara Konta, no ikus mai halo lansamentu projetu.
“Ha’u kontente ho progresu aprovizionamentu ka konkursu públiku ida-ne’e tanba la’o di’ak. Ita espera buat hotu bele la’o ho di’ak no bele implementa,” nia akresenta.
Antes ne’e, Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika, Abel Pires, hodi autoriza prosedimentu aprovizionamentu estrada urbana Maliana pakote I ho valór globál estimativa $16.314.392,06.
Enkuantu, estrada urbana Maliana pakote II no estrada prinsipál ho estimasaun valór globál $23.587.019,36.
Jornalista : Arminda Fonseca
Editora : Julia Chatarina
