VIQUEQUE, 11 janeiru 2023 (TATOLI)—Diresaun Rejistu Sivil munisípiu Viqueque konsege rekolla reseita $21,975 ba kofre Estadu, hahú janeiru to’o dezembru 2022.
“Ami rekolla reseita hosi servisu atendimentu ba sidadaun ne’ebé hakarak trata dokumentu pasaporte,” Diretór Servisu Rejistu Sivil munisípiu Viqueque, Aniceto Moreira, informa iha ninia knaar fatin, Beloi, kuarta ne’e.
Sidadaun ne’ebé trata pasaporte iha tinan 2022, hosi idade 0-12 iha na’in-10, kompostu hosi feto lima no mane lima, idade 13 to’o 16 iha mane 34 no feto 25, idade 17 ba leten iha mane 273 no feto 88, nune’e totál pasaporte emitidu hamutuk 430 no halo renovasaun pasaporte mane 25 no feto 22, ho totál 47.
Notísia relevante: Rejistu Sivil Viqueque prodús sertidaun moris provizóriu tanba laiha blanku
Produsaun pasaporte ho presu $50 hamutuk ema na’in-349 ho totál pagamentu $17.450 no pasaporte ho presu $75 ba ema na’in-59 ho totál pagamentu $4.425.
Maski nune’e, daudaun Diresaun Rejistu Sivil munisípiu Viqueque enfrenta difikuldade atendimentu tanba limitasaun ekipamentu, hanesan komputadór rejistu nasimentu ida, komputadór atende dadus pasaporte ida, scanner daudaun ne’e a’at inklui menus kadeira.
“Iha ha’u-nia fatin mós ekipamentu menus, nune’e difikulta servisu atendimentu. Difikuldade seluk maka menus rekursu umanu tanba ita haree populasaun postu lima iha Viqueque ho ninia populsaun purvolta 100.251. Ho ida-ne’e ami hakarak ministériu aumenta tan rekursu hodi reforsa ami-nia servisu atendimentu populasaun,” nia tenik.
Nia dehan, maski hasoru difikuldade barak, maibé Diresaun Rejistu Sivil munisípiu Viqueque kontinua ho fuan boot halo atendimentu, hahú segunda to’o sesta tanba kada loron populasaun sira sempre mai trata dokumentu ho númeru boot.
Funsionáriu iha Diresaun Rejistu Sivil munisípiu Viqueque hamutuk na’in-hitu, kompostu hosi funsionáriu permanente tolu no kontratadu haat.
Jornalista : Vitorino Lopes da Costa
Editora : Julia Chatarina
