VIQUEQUE, 21 setembru 2022 (TATOLI)–Diretór munisipál konservatóriu rejistu notariadu Viqueque, Aniceto Moreira, informa, daudaun ne’e Servisu Rejistu Sivil munisípiu Viqueque halo produsaun provizóriu ba sertidaun moris tanba blanku laiha.
“Blanku foin hotu horiseik, ami prodús de’it provizoriu uza surat-tahan HVS hodi fó ba abitante sira ne’ebé mai trata sira-nia dokumentu sertidaun moris nian,” Diretór hateten iha ninia knaar fatin, Beloi, kuarta ne’e.
Notísia relevante: Rejistu Sivil Viqueque menus orsamentu atu atende dokumentu iha baze
Nia relata, Rejistu Sivil munisípiu Viqueque simu blanku sertidaun moris hamutuk 500 iha fulan-agostu, nune’e iha fulan-agostu nia laran konsege prodús sertidaun moris 300 no fulan-setembru prodús tan 200, tanba ne’e daudaun laiha blanku.
Rejistu Sivil munisípiu Viqueque hato’o ona kestaun ne’e ba Diresaun Nasionál hodi distribui blanku maibé stock blanku iha armazen nasionál hotu.
“Bainira sira distribui ona mai mak ami prodús dokumentu asli ba abitante sira,” nia akresenta.
Enkuantu, blanku ba Bilhete de Identidade (BI) hamutuk 1.000 sei sufisiente hodi atende abitante sira.
Maski blanku sertidaun moris hotu maibé Servisu Rejistu Sivil kontinua fó atendementu ba abitante iha munisípiu Viqueque, ho órariu atendimentu ba BI hahú segunda to’o sesta, hadi’a sertidaun moris no rejistu kriminál iha loron kuarta no kinta.
Jornalista : Vitorino Lopes da Costa
Editora : Julia Chatarina
