DILI, 12 janeiru 2023 (TATOLI)—Ekipa konjunta kompostu hosi Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P), Diresaun Nasionál Reguladóra Komersiál no Protesaun Konsumidór hosi Ministériu Turizmu, Komérsiu no Indústria (MTKI) halo inspesaun no apreensaun ba produtu masin-midar falun 53 iha loja Dili Mart.
Sub-Inspetór Jerál AIFAESA, I.P, Dionísio Neto da Silva, informa, sira-nia parte halo apreensaun tanba loja ne’e halo espekulasaun ba presu sasán tanba tuir lei númeru 4/2011 01 juñu kona-ba krime asambarkamentu no espekulasaun, bandu atu fa’an produtu stock tuan ho presu a’as.
“Produtu masin-midar ne’ebé ita halo apreensaun ne’e, tuir lei presu justu, sira labele fa’an ho presu liu 10% maibé realidade sira fa’an liu 10% tanba folin masin-midar loloos antes ne’e kilogram ida ho folin $1, maibé sira fa’an ho folin $1,75. Ida-ne’e ita konsidera sira halo espekulasaun ba presu tanba produtu sira la’ós foun maibé tuan,” Sub-Inspetór, hateten ba Agência Tatoli, via telefónika, kinta ne’e.
Notísia relevante: AIFAESA, I.P husu empreza importadór fa’an produtu ho folin anteriór
Nia dehan, produtu ne’ebé sira halo apreensaun daudaun rai hela no hein loja-na’in lori fatura no halo justifikasaun katak produtu ne’ebé sira fa’an foun ka tuan.
“Karik haree sira sosa ho folin karun hosi distributór ruma, ami sei prosesa fali distribuidór ne’ebé sira sosa ba ne’e tanba sira mós kategoria vítima maibé prosesu kontinua la’o. Karik sosa tutan hosi distribuidór, tenke aprezenta fatura hodi justifika katak produtu ne’e foin tama, se lae ami bele prosesa tuir lei,” nia akresenta.
Aleinde ne’e, ekipa konjunta mós notifika empreza rua seluk hanesan supermerkadu W4 no Roca atu aprezenta fatura nesesidade bázika tanba deskonfia iha aumentu presu.
“Ita-nia intervensaun hodi observa presu tanba hakarak kontinua intensifika no kontrola operodór ekonómika sira ne’ebé nafatin halo tentativa aproveita situasaun hodi halo prátika espekulasaun ba presu no asambrankamentu ba produtu sira,” nia dehan.
AIFAESA, I.P nafatin bolu atensaun ba operdór ekonómiku sira atu labele tenta kontra regulamentu sira ne’ebé vigór atu nune’e la prejudika operadór ekonómiku sira nia atividade komersializasaun no kontinua garante presu justu ba konsumidór tuir lei.
Jornalista : Arminda Fonseca
Editora : Julia Chatarina
