iklan

NASIONÁL, HEADLINE, KAPITÁL

APS rejista uma-kain 361 afetadu dezastre naturál durante semana rua

APS rejista uma-kain 361 afetadu dezastre naturál durante semana rua

Prezidente Autoridade Protesaun Sivíl, Ismael da Costa Babo. Imajen Tatoli/Francisco Sony

DILI, 12 janeiru 2023 (TATOLI)–Autoridade Protesaun Sivil (APS, sigla portugés) rejista uma-kain hamutuk 361 afetadu dezastre naturál, durante semana rua ikus, hahú hosi loron 28 dezembru 2022 to’o 11 janeiru 2023.

“Dezastre naturál ne’e akontese iha territóriu nasionál, kompostu hosi anin-boot, inundasaun, rai-halai no ahi han uma,” Prezidente Autoridade Protesaun Sivil, Ismael da Costa Babo, informa hafoin hasoru malu ho Primeiru-Ministru, Taur Matan Ruak, iha Palásiu Governu, kinta ne’e.

Uma ne’ebé hetan estragu iha munisípiu Aileu ida, Ainaro 182, Ataúro rua, Baucau ida, Bobonaro 38, Covalima ida, Dili 23, Ermera ida, Lautém 35, Liquiça 6, Manatuto rua, Manufahi 19, Rejiaun Administrativa Espesiál Oé-cusse Ambeno (RAEOA) 38 no Viqueque 12.

Notísia relevante: Autoridade Protesaun Sivíl iha papél importante proteje vida umana

Hosi ne’e, ahi-han iha munisípiu Dili hamutuk 23, Manufahi haat no Viqueque ida, enkuantu rai-halai iha RAEOA rejista kazu rua, nune’e mós inundasaun iha RAEOA hamutuk 33.

APS iha tipu apoiu rua hanesan faze emerjénsia, fó apoiu hahán no la’ós hahán inklui rekuperasaun bazeia ba levantamentu estragu uma ne’ebé afetadu.

“Tanba ne’e mak fó ona apoia emerjénsia, daudaun iha faze rekuperasaun dadus ba estragu sira,” nia tenik.

Dezastre naturál ne’ebé akontese barak liu iha munisípiu Ainaro hamutuk 182 durante semana rua.

“Komandu hodi hatan ba kestaun dezastre naturál instaladu ona, emediatu sira responde ona ba ita-nia vítima sira,” nia tenik.

Jornalista    : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!