DILI, 12 janeiru 2023 (TATOLI)—Governu liuhosi Sekretaria Estadu Formasaun Profisionál no Empregu (SEFOPE), kinta ne’e, despede tan traballadór timor-oan na’in-50 liuhosi asina deklarasaun aseitasaun no sei arraka bá Koreia Súl iha loron 15 janeiru 2023.
“Ha’u husu traballadór sira ne’ebé hetan ona oportunidade atu bá serbisu iha Koreia Súl ba área peska, atu hatudu komportamentu serbisu di’ak, respeita ema-nia lei, kultura no labele halai ses hosi sistema, nune’e bele hetan nafatin konfiansa hosi empregadór sira,” Sekretáriu Estadu Formasaun Profisionál no Empregu, Alarico do Rosário, hateten iha salaun Timor Lodge, Comoro.
Nia dehan, polítika Governu liuhosi SEFOPE haruka joven timor-oan bá serbisu iha ema-nia rai, la’ós de’it atu bá buka osan, maibé bá buka apreende esperiénsia foun, nune’e bainhira fila bele dezenvolve Timor-Leste sai hanesan país dezenvolvidu iha mundu.
“Ha’u agradese ba Governu Koreia Súl nafatin iha kompromisu rekruta joven timor-oan atu hetan empregu hodi hadi’a ekonomia família no hasa’e kresimentu ekonomia nasaun,” nia akresenta.
Notísia relevante: Governu despede traballadór timor-oan 100 bá serbisu iha Koreia Súl
Iha biban hanesan, Diretór Diresaun Nasionál Empregu Exteriór SEFOPE, Filomeno Soares, esplika, serimónia asina deklarasaun ne’e hanesan konkórdansia ne’ebé família no traballadór halo, katak aseita ona atu husik oan bá serbisu iha rai-li’ur, la’ós Governu maka obriga, nune’e bainhira mosu problema ruma, parte rua iha hotu responsabilidade hodi rezolve.
Nune’e mós, Reprezentante Embaixadór Koreia Súl iha Timor-Leste, Jooyun Yang, hato’o parabéns ba traballdór timor-oan 50 ne’ebé tama iha tinan foun ne’e hetan oportunidade.
“Ha’u hanoin ita-boot sira mak loke dalan iha tinan foun, nune’e ba oin iha nafatin oportunidade ba sira seluk ne’ebé hein hela oportunidade, tanba iha tinan kotuk timor-oan ne’ebé hetan oportunidade bá serbisu iha Koreia Súl iha 1.000 resin. Koreia Súl kontinua fó nafatin oportunidade ba timor-oan bá sebisu ho durasaun tinan-haat fulan-sanulu,” nia informa.
Jornalista : Arminda Fonseca
Editora : Julia Chatarina
