DILI, 12 janeiru 2023 (TATOLI)—Primeiru-Ministru (PM), Taur Matan Ruak, hateten kresimentu Produtu Internu Brutu (PIB) pozitivu, ida-ne’e rekuperasaun ekonómia rai-laran hahú di’ak.
Notísia Relevante: Ministru Finansa deklara ekonomia rai-laran hahú rekupera
“Informa ba Prezidente Repúblika, Ministéiru Finansa fó sai loos kona-ba kresimentu ita-nian tinan 2022 iha pozitivu 3,9 % ne’e di’ak, tanba ita iha 2017, 2018, 2020, ne’e ba kotuk iha 2020 kuaze negativu 8% de’it,” Xefe Governu hateten ba jornalista sira hafoin hala’o enkontru semanál ho Prezidente Repúblika (PR), José Ramos Horta, iha Palásiu Prezidensiál Nicolau LOnato, Bairru Pite, kinta ne’e.
Rekuperasaun ida-ne’e di’ak apezár funu iha Ukránia ho Rússia halo sasán buat hotu folin sa’e, maibé ita se bele kontrola hodi labele prezúdika ita-nia nasaun.
Bibán ne’e, PM mós informa ba Xefe Estadu preparativu ne’ebé Governu halo implementa Orsamentu Jerál Estadu (OJE) 2023.
Tuir pájina Ministeiru Finansa katak, dadus prelimináriu hosi Dirasaun Jerál Estatístika indika katak ita kresimentu Produtu Internu Brutu (PIB) tinan 2022 krese ba 3,9% aas liu fali ita-nia projesaun inisiál 3,3%, tinan 2021 krese ba 2,9% no hosi negativu 8,3% iha 2020.
“Klaru ke taxa kresimentu PIB ne’e ki’ik, tanbá kontribuisaun hosi importasaun ne’ebé (infelizmente) sei aas tebes.
Iha tinan 2022, importasaun halakon tiha 6,8% hosi kresimentu ita-nia PIB,” Ministru Finansa, Rui Gomes, dehan bainhira abertura pakote OJE 2023.
Maske ho kresimentu ki’ik, maibé bele konklui katak ekonomia Timor-Leste hahú rekupera ona hosi efeitu mudansa klimátika, ezekusaun orsamentál ne’ebé fraku, liu-liu iha kapitál dezenvolvimentu no pandemia COVID-19 iha tinan 2021.
Notísia Relevante: PIB la’ós petrolíferu sa’e ba +2,9% iha tinan 2021
Jornalista : Nelson de Sousa
Editór : Cancio Ximenes
