iklan

NASIONÁL, HEADLINE, KAPITÁL

PM orienta entidade relevante identifika fatin harii edifísiu Protesaun Sivil

PM orienta entidade relevante identifika fatin harii edifísiu Protesaun Sivil

Vise-Ministru Interiór, António Armindo. Imajen Tatoli/Francisco Sony

DILI, 12 janeiru 2023 (TATOLI)–Primeiru-Ministru (PM), Taur Matan Ruak, kinta ne’e, konvoka reuniaun ho Ministériu Justisa, Tiago Amaral Sarmento, Sekretáriu Estadu Protesaun Sivil, Joaquim Gusmão dos Reis Martins, Autoridade Protesaun Sivil, no Vise-Ministru Interiór, António Armindo, hodi diskute kona-ba atribuisaun terrenu ba konstrusaun sede Autoridade Protesaun Sivil (APC, sigla portugés).

“Mai ko’alia ho Primeiru-Ministru kona-ba atribuisaun rai ba Autoridade Protesaun Sivil hodi harii edifísiu integradu no edifísiu iha munisípiu tanba to’o agora seidauk iha, sira uza de’it edifísiu antigu ne’ebé la sufisiente ba sira atu halo serbisu, iha korrepondénsia entre Protesaun Sivil no Ministériu Justisa kona-ba rai durante tempu naruk maibé seidauk iha rezultadu, entaun Primeiru-Ministru bolu mai atu rezolve lalais,” Vise-Ministru Interiór, António Armindo, hateten, hafoin reuniaun ho Xefe Governu, iha Palásiu Governu.

Notísia relevante: APS rejista uma-kain 361 afetadu dezastre naturál durante semana rua

Orsamentu ne’ebé prevee ona iha fundu infraestrutura ba instalasaun edifísiu integradu nasionál hamutuk millaun $10 no ba edifísiu iha munisípiu millaun $5. Munisípiu ne’ebé identifikadu hodi estabelese edifísiu maka munisípiu Lautém, Baucau, Ainaro, Covalima, no Aileu.

Iha biban hanesan, Ministru Justisa, Tiago Amaral Sarmento, hateten, bainhira Sekretaria Estadu Protesaun Sivil no Autoridade Protesaun Sivil identifika ona terrenu maka Ministériu Justisa bele atribui.

“Primeiru-Ministru konvoka reuniaun ho ami hodi ko’alia kona-ba fatin no rai iha Dili inklui munisípiu hodi atribui ba Autoridade Protesaun Sivil harii edifísiu,” nia tenik.

Rai identifikadu daudaun instituisaun balun mak uza, tanba ne’e Primeiru-Ministru husu atu tuur hamutuk atu identifika fali, nune’e Ministériu Justisa bele atribui ona tanba Protesaun Sivil halo servisu ajuda sosiál ne’ebé fó atendimentu ba povu.

Jornalista    : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!