DILI, 12 janeiru 2023 (TATOLI)—Prezidente Repúblika (PR), José Ramos Horta, kinta ne’e, simu lideransa estrutura Partidu Demokrátiku (PD) hodi dsikute kona-ba situasaun atuál iha rai-laran.
“Ami aproveita oportunidade ida-ne’e hodi troka ideia ho Xefe Estadu kona-ba situasaun rai-laran nian ita haree iha problema seguransa sai ita hotu nia preokupasaun,” Sekretáriu Jerál PD, António da Conceição ‘Kalohan’ hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite.
Partidu Demokrátiku (PD) husu ba PR atu tau matan di’ak liután ba instituisaun seguransa hodi bele haree situasaun fó seguransa hakmatek ba populasaun hotu nia movimentu ida-idak hala’o atividade livre la sente ta’uk.
Durante sorumutu, estrutura PD troka mós informasaun ho Prezidente Repúblika kona-ba daudaun ne’e presu sasán sa’e iha merkadu.
Sekretáriu Jerál PD ne’e hateten, Xefe Estadu la’ós órgaun ida-ne’ebé atu bele halo ninia atuasaun direta maibé bele bolu atensaun ba entidade relevante sira hodi haree preokupasaun povu hasoru relasiona ho situasaun atuál.
Bibán ne’e, PD husu mós konsellu PR ba tinan 2023 nu’udar tinan polítika sei hasoru eleisaun parlamentár oinsá lori mudansa ba dezenvolvimentu di’ak liután ba nasaun ne’e.
“Ami husu konsellu, tenta ami-nia partidu ida-ne’ebé halo ona tinan 22 la’ós partidu foun, ami hein dehan tinan polítiku bele iha mudansa ita hotu bele hala’o dezenvolvimentu,” nia hateten.
Notísia Relevante: Alfándega identifika seidauk iha sasán importasaun foun tama hosi portuária-fronteira
Jornalista : Nelson de Sousa
Editór : Cancio Ximenes
