DILI, 08 janeiru 2023 (TATOLI)–Governu liuhosi Ministériu Turizmu Komérsiu no Indústria (MTKI) sesta (06/01) ne’e fó atensaun sériu ba importadór sira-ne’ebé halo espekulasaun ba presu sasán iha rai-laran, tanba parte Alfándega rasik identifika seidauk iha sasán importasaun foun tama hosi portuáriu no fronteira sira iha Timor-Leste iha 2023 ne’e.
Notísia Relevante: MTKI konsidera empreza balun halo espekulasaun presu sasán
Komisáriu Autoridade Aduaneira AA/Alfándega, José António Fátima Abílio, hateten, sistema ba impostu foun nian foin mak ajusta iha 04 janeiru 2023 no seidauk iha importasaun foun tama hosi portuária no fronteira sira iha Timor-Leste.
“Ita-nia sistema ba impostu foun nian foin ajusta iha loron 04 janeiru 2023 no seidauk iha importasaun foun tama hosi portuária no fronteira sira Timor-Leste nian,” José António Fátima Abílio hateten liuhosi nota komunikadu ne’ebé Agência Tatoli asesu, domingu ne’e.
Haree ba sistema impostu foun nian ne’ebé foin ajusta, Vise-Ministru Komérsiu no Indústria, Domingos Lopes Antunes, fó atensaun sériu ba importadór sira hanesan Lisun, Perissos, Kreative Furak, Star King, Fortuna Lorosa’e no sira seluk atu koopera ho Governu faan sasán tuir de’it lei ne’ebé iha.
“Ha’u husu importadór sira koopera ho Governu labele aproveita rejime foun hasa’e impostu importasaun no “excise tax” ba produtu seletivu nian halo espekulasaun ba folin sasán hotu-hotu ho presu ne’ebé la justu, tanba tuir lei númeru 4/2011 krime asambarkamentu no espekulasaun nian iha konsekuénsia la’ós de’it fó pena multa maibé bele ba prizaun,” Governante ne’e hateten.
Iha sesta (06/01) semana kotuk, Vise-Ministru komérsiu no Indústria no Inspetor Jerál AIFAESA fó instrusaun kedan ba ekipa Governu halo atuasaun no kontrollu iha terrenu no suspende kedas importadór Perissos ne’ebé lakohi koopera hatudu fatura sasán tuan nian.
Ho preokupasaun públiku relasiona folin sasán sa’e liu-liu ba masin-midar no bebida non alkólika, Vise Ministru Komérsiu Indústria husu ba AIFAESA hanesan autoridade reguladór, servisu makaas hodi halo kontrolu másimu ba operadór ekonómiku sira, hodi rekolla faktura kompra produtu hotu, hodi justifika bainhira sira halo espekulasaun ba presu.
Notísia Relevante: Xefe Estadu husu Governu haree presu sasán sa’e iha merkadu
Jornalista : Arminda Fonseca
Editor : Cancio Ximenes
