DILI, 12 janeiru 2023 (TATOLI)–Ministériu Finansa (MF) liuhosi Diresaun Jerál Jestaun Patrimóniu Estadu, realiza abertura proposta leilaun patrimóniu Estadu ba faze XV, ne’ebé submete ona proposta iha loron 28 dezembru 2022 hodi loke rekerimentu leilaun, liuhosi modalidade konkursu públiku ho maneira transparente no akuntável.
Ministru Finansa, Rui Augusto Gomes, hateten, atividade leilaun ne’e bazeia ba dekretu-lei númeru 32/2011 kona-ba jestaun no alienasaun bens imovel Estadu no diploma ministeriál númeru 15/2012 kona-ba manuál jestaun no alienasaun patrimóniu movel Estadu.
“Konsellu Ministru iha loron 07 setembru 2022 aprova ona dadus finál jestaun frota no veíkulu, ne’ebé tama iha lista redusaun leilaun hamutuk unidade 1.109, maibé iha leilaun faze XV ne’e, sei aplika ba veíkulu Estadu hamutuk unidade 615, enkuantu restu sei kontinua implementa iha faze tuir mai,” Ministru hateten iha ámbitu serimónia abertura proposta leilaun ba faze XV, iha resintu Diresaun Jerál Jestaun Patrimóniu Estadu, Balide, kinta ne’e.
Ministru Finansa fiar katak, prosesu leilaun sei realiza ho transparente, integridade, profisionál no kontinua hetan konfiansa hosi públiku atubele sai hanesan referénsia ida ba prosesu leilaun sira iha faze tuir mai.
Diresaun Jerál Jestaun Patrimóniu Estadu hosi Ministériu Finansa realiza atividade leilaun ho objetivu prinsipál rua, dahuluk, atu salva guarda kondisaun bens imovel Estadu no fonte rekolla reseita doméstika aleinde impostu, taxa no kontribuisaun sira seluk hodi bele sustenta mákina Estadu, atu nune’e bele iha kapasidade finanseira hodi finansia programa no atividade sira.
“Ami-nia dadus hatudu ona katak hosi tinan 2018 to’o 2021, Diresaun Jerál Patrimóniu Estadu implementa ona leilaun to’o faze XIV. Hosi atividade ne’e konsege hatama reseita mai kofre Estadu hamutuk millaun $1,75,” Ministru informa.
Notísia relevante: Governu altera dekretu-lei regulamentu veíkulu Estadu
Objetivu prinsipál daruak maka Governu bele kontinua halo poupansa no redús despeza iha kustu operasionál uzu karreta Estadu. Hahú hosi tinan 2000 to’o 2020, Governu Timor-Leste gasta ona millaun $122 ba manutensaun veíkulu no millaun $135 sosa kombustível, ho totál kustu operasionál ba manutensaun no kombustível hamutuk millaun $257.
Aleinde ne’e, kada tinan hatudu Governu gasta millaun $14,3 ka fulan-ida gasta millaun $1,2, ka loron ida gasta $57.000 ba de’it mina no manutensaun veikulu Estadu.
MF nia dadus ikus kona-ba levantamentu veíkulu Estadu no hatudu katak hahú hosi tinan 2002 to’o 2020 Governu Timor-Leste gasta ona osan millaun $125 hodi sosa karreta Estadu foun hamutuk unidade 3.415.
“Despeza ida-ne’e halo orsamentu ba mákina Estadu sai a’as tebes no dezvia despeza ne’ebé tuir loloos aloka ba setór produtivu sira hodi dudu kresimentu ekonómiku. Fasilidade karreta Estadu ne’e mós, em vez de rezulta ba kresimentu iha prestasaun servisu ba públiku ne’ebé a’as, maibé infelizmente hatodan fali kapasidade finanseira Estadu nian,” Ministru preokupa.
Ho razaun hirak ne’e mak iha setembru 2021, VIII Governu Konstitusionál opta polítika foun liuhosi aprovasaun dekretu-lei kona-ba subsídiu transporte hodi transforma kustu operasionál karreta Estadu ba subsídiu transporte, ne’ebé nu’udar meiu ida atu hakbiit kapasidade funsionáriu públiku ba despeza transporte no atu hamenus kustu sosa karreta foun, kombustível no manutensaun.
Nune’e mós, atu mellora jestaun veíkulu ne’ebé rigorozu, Konsellu Ministru aprova ona Rezolusaun Governu númeru 130/2021 kona-ba jestaun no realokasaun veíkulu Estadu ne’ebé regula no kria kondisaun sira atubele reforsa jestaun ne’ebé efisirnte no rigór liután atu nune’e bele kontribui ba efisiénsia no rasionalizasaun gastu ba Karreta Estadu.
Rezultadu hosi opta polítika foun ne’e mak iha tinan 2022, Governu konsege halo poupansa iha despeza públika besik millaun $2 iha kombustível no manutensaun karreta Estadu.
Jornalista : Antónia Gusmão
Editora : Julia Chatarina
