iklan

COVID-19, HEADLINE, MUNISÍPIU, OÉ-CUSSE (RAEOA), SAÚDE

Autoridade RAEOA apela inan-aman enkoraja oan partisipa kampaña nasionál imunizasaun integrada

Autoridade RAEOA apela inan-aman enkoraja oan partisipa kampaña nasionál imunizasaun integrada

Adjuntu Prezidente Autoridade RAEOA ba Asuntu Sosiál, Maximiano Neno. Imajen Tatoli/Abílio Elo Nini.

OÉ-CUSSE, 13 janeiru 2023 (TATOLI) – Adjuntu Prezidente Autoridade RAEOA, ba Asuntu Sosiál, Maximianu Neno, apela komunidade sira atu enkoraja oan sira atu partisipa iha kampaña nasionál hosi simu imunizasaun nune’e bele prevene hosi moras oinoin.

“Servisu ida-ne’e atu kompleta no kontinua de’it programa sira anteriór hanesan COVID-19, ita tenke hatudu nafatin vontade atu koopera ho profisionál saúde, inan-aman sira presiza enkoraja ita-nia oan sira hodi simu imunizasaun, tanba bainhira simu ona ita bele hasa’e imunidade hodi prevene-an hosi moras oioin,” Maximiano Neno, ko’alia iha ámbitu lansamentu kampañia nasionál integrada iha sentru saúde Kiumaonteko, kinta ne’e.

Nia afirma, Governu Timor-Leste servisu hamutuk ho parsériu internasionál sira hanesan Organizasaun Mundiál Saúde (OMS), UNICEF, ho intensaun hakarak liberta povu hosi moras oioin.

“Entaun nu’udar komunidade ita tenke agradese ba tulun ida-ne’e, ha’u esperu xefe suku no xefe aldeia sira informa beibeik ba ita-nia inan-aman sira iha suku atubele lori oan sira ho idade tinan lima (5) mai kraik hodi simu vasinasaun ba imunizasaun iha fasilidade saúde ne’ebé besik iha suku idak-idak,” nia husu.

Nia enkoraja profisionál saúde sira atu kontinua servisu ho laran hodi fó atendimentu dia’k ba komunidade sira nune’e kampaña nasionál ne’e bele la’o ho susesu.

“Pesoál saúde ne’ebé sei namkari iha territóriu RAEOA ba postu saúde 110 iha suku 18, atu implementa programa nasionál ne’e ho di’ak, uza maneira ne’ebé maka ita-boot sira iha, ita iha esperiénsia ona hanesan ho COVID-19 hasoru dezafiu barak, maibé ikus mai ita konsege konvensie komunidade sira hodi partisipa simu vasinasaun, ha’u fiar programa ne’e sei la’o ho susesu iha Oé-Cusse,” nia fó hanoin.

Entretantu, kampaña nasionál integrada ne’e atu fó imunizasaun prioridade ba labarik tinan lima karaik sei simu introdusaun vasina pneumococcal (PCV), imunizasaun sarampu, rubella, póliu, vítimina A no ai-moruk kontra lumbringa.

Nune’e mós ba labarik tinan 12 ba leten sei simu vasinasaun COVID-19 doze primeiru no segundu no doze boster ba tinan 18 ba leten.

Purtantu, kampañia nasionál integradu ne’e hala’o iha Oé-Cusse hahú iha loron 12 sei termina iha loron 18 fevereiru 2023.

Notísia relevante: Labarik 10,124 iha Bobonaro sai alvu simu imunizasaun integrada

Jornalista   : Abílio Elo Nini
Editór          : Evaristo Soares Martins

iklan
iklan

Leave a Reply

iklan
error: Content is protected !!