KHUNTO la realiza kongresu ba eleisaun parlamentár 2023
DILI, 13 janeiru 2023 (TATOLI)—Konsilleiru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar, hateten KHUNTO la presiza realiza kongresu ba iha eleisaun parlamentár 2023.
Notísia Relevante: Horta sei konsulta líder partidu polítiku-Governu marka data eleisaun parlamentár
“Ami foin daudaun hala’o ona kongresu, ne’ebé la presiza hala’o tan. Tan ne’e, ita hotu hein no kompeténsia tomak Prezidente Repúblika nian bainhira mak dekreta kalendáriu eleisaun parlamentár, no ami hosi partidu KHUNTO hein ba eleisaun parlamentár mai,” Konsilleiru Partidu KHUNTO ne’e hateten ba Agência Tatoli iha sede partidu KHUNTO, Manleuana, sesta ne’e.
Maske nune’e, maibé tuir lei númeru 2/2016 obriga partidu polítiku sira-ne’ebé rejistadu tenke realiza kongresu nasionál ka konferénsia, nune’e bele kompete iha eleisaun parlamentár 2023.
Iha lei númeru 2/2016, 3 fevereiru (Lei partidu polítiku) artigu 19 (Kongresu no Konferénsia Nasionál partidu sira) iha númeru 1 hateten, partidu polítiku sira bele kria órgaun ne’ebé julga nesesáriu ba prosekusaun objetivu, pelumenus, órgaun sentrál reprezentativu ida, ho funsaun deliberativa.
Iha númeru 2 hatktuir, Kongresu ka Konferénsia Nasionál partidu nian ne’e aas liu órgaun deliberativu nível nasionál, pelumenus dois terços hosi delegadu sira-ne’ebé diretamente eleitu hosi respetivu sírkulu partidáriu, asegura ho partisipasaun no reprezentatividade hosi baze.
Iha númeru 3 ne’e hateten, Kongresu ka Konferénsia Nasionál iha kompeténsia eskluziva ne’ebé prosede ba aprovasaun estatutu no programa polítiku.
Númeru 4 hosi artigu 19 ne’e akresenta, Kongresu ka Konferénsia partidu nian tenke halo másimu tinan haat (4) dala-ida.
Konsilleiru Naimori hateten, preparasaun partidu KHUNTO ba hasoru eleisaun ne’e, daudaun ne’e partidu KHUNTO preparadu atu avansa hodi kompete iha eleisaun parlamentár 2023.
Jornalista : Nelson de Sousa
Editór : Cancio Ximenes
